پیسہ ہر صوبے کے پاس ہے مگر کام کرنے کی نیت نہیں: مریم نواز

لاہور (ویب ڈیسک) وزیرِ اعلیٰ پنجاب مریم نواز نے کہا ہے کہ پنجاب کو زیادہ پیسہ ملنے کا جھوٹ بولا جاتا ہے، پیسہ ہر صوبے کے پاس موجود ہے، صرف کام کرنے کی نیت اور ارادے کی کمی ہے۔ نیشنل ورکشاپ بلوچستان کے شرکاء سے خطاب کرتے ہوئے مریم نواز نے کہا کہ لوگ بڑی وزارت حاصل کر کے پروٹوکول اور سیاست پر توجہ دیتے ہیں، میں سمجھتی ہوں کہ اچھی گورننس سے بہتر کوئی سیاست نہیں، سیاست عوام کی خدمت کا نام ہے۔ آپ اس دھوکے میں نہ آئیں کہ کوئی صوبہ اس لیے محروم ہے کہ اس کے پاس پیسہ نہیں۔ انہوں نے کہا کہ ہمارے دل کے دروازے سب کے لیے کھلے ہیں، پنجاب کے اسپتالوں میں دیگر صوبوں کے مریضوں کا علاج ہو رہا ہے، دوسرے صوبوں کے طلبہ بھی پنجاب کے تعلیمی اداروں میں تعلیم حاصل کر رہے ہیں۔ میں صوبوں میں فرق نہیں کرتی، کیونکہ اس سے ملک کمزور ہوتا ہے۔ ان کا کہنا تھا کہ پنجاب میں جو اسکیمیں چل رہی ہیں وہ میری نہیں بلکہ عوام کے پیسوں سے چل رہی ہیں۔ میں نے سب سے پہلے سفارش اور رشوت کے کلچر کو ختم کیا، حلف لے کر کہہ سکتی ہوں کہ ایک بھی شخص سفارش پر نہیں لگایا گیا۔ میں خود روزانہ 30، 30 انٹرویوز کرتی ہوں۔