کراچی بڑی تباہی سے بچ گیا، افغانستان سے لایا گیا دو ہزار کلوگرام سے زائد بارودی مواد برآمد، 3 دہشت گرد گرفتار

کراچی (ویب ڈیسک) کراچی میں قانون نافذ کرنے والے اداروں نے بروقت کارروائی کرتے ہوئے شہر کو بڑی تباہی سے بچا لیا، دو ہزار کلوگرام سے زائد تیار بارودی مواد قبضے میں لے کر تین دہشت گردوں کو گرفتار کر لیا گیا۔ ایڈیشنل آئی جی سی ٹی ڈی ذوالفقار لاڑک اور ڈی آئی جی سی ٹی ڈی غلام اظفر مہيسر نے پریس کانفرنس کرتے ہوئے بتایا کہ سیکیورٹی اداروں نے کراچی کے علاقے بلدیہ رئیس گوٹھ میں کارروائی کرتے ہوئے دو ہزار کلوگرام سے زائد بارودی مواد قبضے میں لے کر ایک دہشت گرد کو موقع پر گرفتار کیا، جبکہ اس کی نشاندہی پر مختلف مقامات پر چھاپے مار کر مزید دو دہشت گردوں کو گرفتار کیا گیا۔ غلام اظفر مہيسر نے بتایا کہ ابتدائی تحقیقات کے مطابق دھماکہ خیز مواد افغانستان سے بلوچستان اور پھر کراچی لایا گیا، دہشت گردوں نے کراچی سے 35 سے 40 کلومیٹر کے فاصلے پر ایک گھر کرائے پر حاصل کیا تھا۔ سیکیورٹی اداروں نے بروقت کارروائی کرتے ہوئے 30 سے زائد پلاسٹک ڈرموں سے بارودی مواد اور 5 دھاتی گیس سلنڈر برآمد کیے۔ ڈرموں میں کمرشل ایکسپلوسیو اور مکس بارودی مواد شامل تھا، جو مکمل طور پر تیار تھا۔ انہوں نے بتایا کہ اس دہشت گردی کے منصوبے میں کالعدم بلوچستان لبریشن آرمی کے دہشت گرد ملوث ہیں، یہ منصوبہ بیرونِ ملک تیار کیا گیا تھا۔ اس کے سہولت کاروں اور ہینڈلرز کی نشاندہی کر لی گئی ہے اور ان کی گرفتاری کے لیے چھاپے مارے جا رہے ہیں۔ ان کا کہنا تھا کہ گرفتار دہشت گردوں کی شناخت جلیل عرف فرید، نیاز عرف کنگ اور حمدان عرف فرید کے ناموں سے ہوئی ہے۔