بنگلہ دیش کی پہلی خاتون وزیر اعظم خالدہ ضیاء کی نمازِ جنازہ ادا، ہزاروں افراد کی شرکت

ڈھاکا (ویب ڈیسک) بنگلہ دیش کی پہلی خاتون وزیر اعظم خالدہ ضیاء کی نمازِ جنازہ ادا کر دی گئی۔ خالدہ ضیاء کی نمازِ جنازہ ڈھاکا میں بنگلہ دیش کی پارلیمنٹ ہاؤس کے سامنے میا مانک ایونیو میں ادا کی گئی، جس میں سیاسی رہنماؤں سمیت ہر مکتبہ فکر سے تعلق رکھنے والے افراد نے بڑی تعداد میں شرکت کی۔ بنگلہ دیش کے چیف ایڈوائزر ڈاکٹر محمد یونس نے بھی نمازِ جنازہ میں شرکت کی، جبکہ پاکستان حکومت کی نمائندگی قومی اسمبلی کے اسپیکر سردار ایاز صادق نے کی۔ وزیر اعظم شہباز شریف کی ہدایت پر ایاز صادق نے پاکستانی حکومت اور عوام کی جانب سے خالدہ ضیاء کے لواحقین سے تعزیت کی۔ نمازِ جنازہ کے بعد خالدہ ضیاء کو ان کے شوہر اور بنگلہ دیش کے سابق صدر ضیاء الرحمٰن کے پہلو میں سپردِ خاک کر دیا گیا۔ یاد رہے کہ دو مرتبہ بنگلہ دیش کی وزیر اعظم رہنے والی خالدہ ضیاء دو روز قبل ڈھاکا کے ایک اسپتال میں انتقال کر گئی تھیں۔ خالدہ ضیاء 1991 سے 1996 اور پھر 2001 سے 2006 تک بنگلہ دیش کی وزیر اعظم رہیں۔