نئون سال, وقت جي نئين وک، زندگيءَ جي نئين سڃاڻپ

وحيد حيات قريشي

گذريل سال ۾ جيڪڏهن اسان ڪاميابي حاصل ڪئي هجي، ته اهو اسان لاءِ فخر جو باعث آهي، پر جيڪڏهن ناڪامي ملي هجي، ته اهو مايوسي جو سبب نه بڻجڻ گهرجي. ناڪامي اصل ۾ ڪاميابي ڏانهن ويندڙ رستي جو پهريون ڏاڪو هوندي آهي. نئين سال جي شروعات تي انسان کي گهرجي ته هو ناڪامين مان سبق حاصل ڪري ۽ وڌيڪ همت سان اڳتي وڌي.
نئون سال انسان جي زندگيءَ ۾ هڪ اهڙو اهم مرحلو هوندو آهي، جيڪو صرف تاريخ جي تبديلي نه، پر سوچ، احساس ۽ عمل جي تبديليءَ جو به پيغام کڻي اچي ٿو. جڏهن پراڻو سال پنهنجي آخري لمحن ۾ داخل ٿئي ٿو، تڏهن انسان جي ذهن ۾ يادون، تجربا ۽ احساس هڪ فلم جيان گردش ڪرڻ لڳن ٿا. ڪي لمحا خوشيءَ سان ڀرپور هوندا آهن ته ڪي لمحا اکين ۾ ڳوڙها آڻي ڇڏيندا آهن، پر اهي سڀ گڏجي انسان کي زندگيءَ جو حقيقي سبق سيکاريندا آهن.
وقت هڪ اهڙي حقيقت آهي، جنهن کي نه روڪي سگهجي ٿو ۽ نه وري واپس آڻي سگهجي ٿو. هر گذرندڙ سال انسان جي عمر مان هڪ حصو کڻي وڃي ٿو، پر ساڳي وقت نئون سال انسان کي نيون اميدون، نوان خواب ۽ نوان موقعا به ڏئي ٿو. نئون سال اسان کي اهو موقعو ڏئي ٿو ته اسين پنهنجي گذريل عملن جو جائزو وٺون، پنهنجي ڪوتاهين کي سڃاڻون ۽ پنهنجي مستقبل لاءِ مضبوط ارادا قائم ڪريون
نئون سال خاص طور تي نوجوان نسل لاءِ وڏي اهميت رکي ٿو، ڇو ته نوجوان قومن جو مستقبل هوندا آهن. جيڪڏهن نوجوان علم، اخلاق ۽ محنت کي پنهنجو شعار بڻائين، ته قوم کي ترقي کان ڪير به روڪي نٿو سگهي. افسوس سان چوڻو پوي ٿو ته اسان جي سماج ۾ ڪيترائي نوجوان وقت کي فضول سرگرمين ۾ ضايع ڪري رهيا آهن، جنهن سبب نه صرف سندن پنهنجو مستقبل خطري ۾ آهي، پر سڄي قوم پوئتي رهجي رهي آهي. نئون سال نوجوانن لاءِ اهو پيغام آهي ته هو پاڻ کي سڃاڻن، پنهنجي صلاحيتن کي اجاگر ڪن ۽ ملڪ ۽ قوم جي خدمت لاءِ تيار ٿين.
تعليم ڪنهن به سماج جي ترقيءَ جو بنيادي ستون هوندي آهي. تعليم کان سواءِ نه سوچ ترقي ڪري ٿي ۽ نه سماج اڳتي وڌي ٿو. نئين سال جي موقعي تي اسان کي اهو عهد ڪرڻ گهرجي ته اسين تعليم کي ترجيح ڏينداسين، پنهنجي ٻارن کي اسڪول موڪلينداسين ۽ علم حاصل ڪرڻ کي عبادت سمجهنداسين. تعليم ئي اهو هٿيار آهي، جنهن سان جهالت، غربت ۽ ناانصافيءَ خلاف جنگ وڙهي سگهجي ٿي.
اسان جي سماج کي ڪيترن ئي مسئلن جو منهن ڏيڻو پوي ٿو، جن ۾ غربت، بيروزگاري، مهانگائي، صحت جون خراب سهولتون ۽ انصاف جي کوٽ شامل آهن. نئون سال اسان کي اهو موقعو ڏئي ٿو ته اسين انهن مسئلن بابت سنجيدگي سان سوچيون ۽ حل ڳوليون. جيڪڏهن هر فرد پنهنجي ذميواري سمجهي ايمانداري سان ڪم ڪري، ته تبديلي ممڪن آهي. تبديلي ڪنهن هڪ شخص يا اداري سان نه ايندي، پر گڏيل ڪوششن سان ايندي.
نئون سال انسانيت، محبت ۽ ڀائيچاري کي وڌائڻ جو به پيغام ڏئي ٿو. اڄ جي دنيا ۾ نفرت، تڪرار ۽ خودغرضي وڌي رهي آهي. ماڻهو ماڻهوءَ کان پري ٿي رهيو آهي. نئين سال تي جيڪڏهن اسين اهو عهد ڪريون ته اسين هڪ ٻئي سان محبت، برداشت ۽ احترام سان پيش اينداسين، ته سماج مان ڪيترائي مسئلا پاڻمرادو ختم ٿي سگهن ٿا. ڪنهن جي دل نه ڏکوئڻ، ڪنهن جي مدد ڪرڻ ۽ ڪنهن جي تڪليف کي محسوس ڪرڻ ئي اصل انسانيت آهي.v نئون سال اسان کي اخلاقي قدرن ڏانهن موٽڻ جي به دعوت ڏئي ٿو. سچائي، ايمانداري، انصاف، صبر ۽ شڪر اهي اهڙا اصول آهن، جن سان فرد ۽ سماج ٻئي مضبوط ٿين ٿا. جيڪڏهن اسان نئين سال تي ڪوڙ، دوکو، رشوت ۽ ناانصافيءَ کان پاسو ڪرڻ جو پڪو ارادو ڪريون، ته سماج ۾ امن ۽ سڪون پيدا ٿي سگهي ٿو.
وقت جي قدر ڪرڻ نئين سال جو اهم سبق آهي. هر ڏينهن، هر ڪلاڪ ۽ هر لمحو قيمتي آهي. جيڪو انسان وقت جي اهميت کي سمجهي ٿو، سو ڪڏهن به ناڪام نٿو ٿئي. نئين سال جي شروعات تي اسان کي اهو ارادو ڪرڻ گهرجي ته اسين پنهنجو وقت سٺن ڪمن، علم حاصل ڪرڻ، عبادت ۽ سماج جي خدمت ۾ صرف ڪنداسين
ماڻهو مختلف طريقن سان نئون سال ملهائيندا آهن. 31 ڊسمبر جي رات، ڪيترائي آتشبازي ۽ ڳڻپ ڏسڻ لاءِ گڏ ٿيندا آهن. سڊني، لنڊن ۽ نيو يارڪ جهڙن شهرن ۾ مشهور جشن ملهايا ويندا آهن. گهر، گهٽيون ۽ دڪان روشنين ۽ بينرن سان سينگاريل آهن يونائيٽيڊ عرب امارات جي خوبصورت شهر دبئي هر سال جيان هن نئين سال جي شام تي به ڀرپور انداز ۾ نظر ايندو ڊائون ٽائون روشنين، آتشبازي ۽ دلچسپ لائيو پرفارمنس سان ڀريل هڪ وڏي اسٽيج ۾ تبديل ٿي رهيو آهي.

پراپرٽي ڊولپر ايمار اعلان ڪيو آهي ته هن سال برج خليفا تي جشن 2025/26 لاءِ وڏو، بهتر ۽ وڌيڪ شاندار هوندو.
بهرحال، مکيه تقريب نئين سال جي شام تي ٿيندي، ۽ صرف 31 ڊسمبر تي آتشبازي ٿيندي.
جشن جا عنصر، جن ۾ ليزر ڊسپلي، ڊرون شو ۽ هم وقت ساز دبئي فاؤنٽين پرفارمنس شامل آهن، اربع 7جنوري تائين ڏسي سگهجن ٿا
آلله سآئين کان اهان دعا آهي ته جيئن شاھ ڀٽائي جو شعر آهي
سائيم سدائين ڪرين مٿي سنڌ سڪار
دوست مٺا دلدار، عالم سڀ آباد ڪرين
آخر ۾ اهو چئي سگهجي ٿو ته
نئون سال هر انسان لاءِ هڪ نئون امتحان، هڪ نئون موقعو ۽ هڪ نئين ذميواري آهي. جيڪڏهن اسين نئين سال کي صرف جشن تائين محدود رکون ٿا، ته ان جي اصل روح وڃائي ويهنداسين. پر جيڪڏهن اسين نئين سال کي سٺن ارادن، سٺن عملن ۽ مثبت سوچ سان شروع ڪنداسين، ته يقيناً اسان جي زندگي، اسان جو سماج ۽ اسان جو مستقبل روشن ٿيندو. دعا آهي ته نئون سال اسان سڀني لاءِ امن، محبت، خوشحالي، علم ۽ ڪاميابي کڻي اچي. الله ڪري ته اسان جا دل صاف، اسان جا ارادا مضبوط ۽ اسان جا عمل سٺا ٿين ــ آمين.