ڏوڪري ۾ ايف آءِ اي جي ڇاپن بعد بي آءِ ايس پي سينٽر ٻن ڏينهن کان بند پيل

وظيفو وٺڻ لاءِ آيل مستحق عورتون ٻن ڏينهن کان سخت پريشاني جو شڪار بڻيل

ڏوڪري (اطهر ميمڻ) ڏوڪري سميت سڄي تعلقي ۾ بينظير انڪم سپورٽ پروگرام (BISP) جا سمورا سينٽر ۽ دڪان ايف آءِ اي جي ڇاپن کانپوءِ بند ٿي ويا، جنهن سبب وظيفو وٺڻ لاءِ آيل مستحق عورتون 2 ٻن ڏينهن کان سخت پريشاني جو شڪار بڻجي ويون آهن.ايف آءِ اي جي ضلعي ۾ ڇاپن دوران ڪيترن ئي غير قانوني ڪٽوتين ڪندڙ فرنچائزز ۽ دڪاندارن خلاف ڪارروائي جي خوف کان ڊڄي ڪيترن ئي مرڪزن پنهنجو ڪم بند ڪري پنهنجا موبائل فون پڻ بند ڪري ڇڏيا آهن.وظيفو وٺڻ لاءِ 2 ڏينهن کان مسلسل صبح سوير آيل سوين عورتون مرڪزن جي ٻاهران انتظار ۾ بيهي رهن ٿيون جتي نه پاڻيءَ جي سهولت آهي، نه ڇانوَ، ۽ نه ئي ڪو انتظام. عورتن شڪايت ڪندي چيو ته هتي اسان سان ناانصافي ٿي رهي آهي، وظيفو ته پري جي ڳالھ پر هاڻ مرڪز ئي بند پيا آهن. ايف آءِ اي پنهنجي ڪاروائي جاري رکي پر حڪومت کي گهرجي ته متبادل ۽ منصفاڻي نظام تحت عورتن کي سندن رقم پهچائي وڃي ته جيئن غريب طبقي جي عورتن کي تڪليف نه ٿئي.