اسان سنڌ جا اڇوت ٿي ويا آهيون، جتي وڃون ٿا، اتي زور پئجي وڃي ٿو: مرتضيٰ جتوئي

چون ٿا ته لنجار هائوس گهر کي باهه ڏيڻ ۾ ڪيميڪل جو استعمال ٿيو، هيءُ ڪيمڪل اهو آهي، جيڪو بينظير ڀٽو جي شهادت بعد استعمال ٿيو

مورو (رپورٽر) اين پي پي سربراهه غلام مرتضيٰ جتوئي ڳوٺ بجراڻي لغاري ۾ شهيد عرفان لغاري ۽ زاهد لغاري جي وارثن سان تعزيت ڪرڻ بعد ميڊيا سان ڳالهائيندي چيو ته اسان سنڌ جا اڇوت ٿي ويا آهيون، جتي وڃون ٿا، اتي زور پئجي وڃي ٿو، چون ٿا ته گهر کي باهه ڏيڻ ۾ ڪيميڪل جو استعمال ٿيو هيءُ ڪيمڪل اهو آهي، جيڪو بينظير ڀٽو جي شهادت بعد استعمال ٿيو، سڀني کي خبر آهي ته ڪيميڪل ڪنهن وٽ آهي، پاڻ پنهنجي گهر کي باهه ڏياري پرامن احتجاج تي فائرنگ ڪرائي وئي، پرائيويٽ ماڻهن به فائرنگ ۾ حصو ورتو، سندس وڌيڪ چوڻ هو ته زاهد ۽ عرفان لغاري جي وارثن وٽ تعزيت لاءِ ان ڪري نه پهچي سگهياسين ته اسان کي پاڻ ڪيسز ۾ ڦاسايو ويو هو، اسان جي اڄ تائين پڪي ضمانت منظور ناهي ٿي، اسان کي اينٽي پاڪستان ڏيکارڻ جي ڪوشش ڪئي وئي، اسان يا لغاري اينٽي پاڪستان نه آهيون، اسان کي پيپلزپارٽي ۾ شامل ٿيڻ جي آڇ ڪئي وئي، اسان شامل نه ٿياسين، شايد اها ڳالهه هنن کي نٿي وڻي