ڊي سي نوشهرو فيروز محمد ارسلان سليم جي صدارت هيٺ ڊينگي وائرس بابت اجلاس

صحت کاتي سان گڏ ٻيا لاڳاپيل آفيسر هن مهم کي ڪامياب بنائڻ لاءِ پنهنجو ڪردار ادا ڪن: محمد ارسلان سليم

نوشهرو فيروز (ڊ ر)ڊپٽي ڪمشنر نوشهرو فيروز محمد ارسلان سليم جي صدارت هيٺ ڊينگي وائرس جي روڪٿام،ڪنٽرول ۽ آگاهي مهم بابت هڪ اهم اجلاس سندس آفيس ۾ ٿيو.اجلاس ۾ ڊي ايڇ او ڊاڪٽر غلام قادر چانڊيو،ڊي ايم پي پي ايڇ آئي محسن علي عباسي، ڊينگي وائرس جي ضلعي فوڪل پرسن ڊاڪٽر عبدالستار، سڀني ميونسپل ۽ ٽائون ڪامٽين جا آفيسر،صحت، تعليم ، روينيو،لوڪل گورنمنٽ ۽ ٻين لاڳاپيل کاتن جا آفيسر پڻ هن گڏجاڻي ۾ شريڪ هئا. ڊپٽي ڪمشنر چيو ته صحت کاتي سان گڏ ٻيا لاڳاپيل آفيسر هن مهم کي ڪامياب بنائڻ لاءِ پنهنجو ڪردار ادا ڪن. هن چيو ته سڀني تعلقن جا اسسٽنٽ ڪمشنر ڊينگي جي وائرس جي خاتمي لاءِ ٿيندڙ اسپري مهم جي نگراني ڪن. هن صحت کاتي جي آفيسرن کان موجود اسپري مشينن،دوا ۽ ڊينگي جي ٽيسٽ لاِءِ موجود ڪٽن جي تعداد معلوم ڪئي . هن زور ڀريو ته سرڪاري اسپتالن سان گڏ نجي اسپتالن ۽ ليبارٽرين مان ٽيسٽ ڪرائيندڙ ڊينگي جي مريضن جو اطلاي فوري طور تي ڊپٽي ڪمشنر آفيس ۾ قائم ڪنٽرول روم تي ڏنو وڃي. هن لوڪل گورنمنٽ جي آفيسرن تي زور ڀريو ته هو هر ٽائون ڪاميٽي ۾ گھٽ۾گھٽ ٻه اسپري مشينون خريد ڪن ۽ پنهنجي حدن پر ۾ مڇرمار اسپري کي يقيني بنائڻ ۽ اهڙي رپورٽ روزاني بنياد تي فراهم ڪن.هن چيو تهي شهرين کي ڊينگي بابت ڄاڻ فراهم ڪرڻ لاءِ اگاهي جا پيغام پهچايا وڃن.هن صحت کاتي جي آفيسرن کي هدايت ڪئي ته سڀني سرڪاري اسپتال ۾ ڊينگي وارڊ قائم ڪيا وڃن، ۽ جنهن علائقي مان ڊينگي جي اطلاع ملي اتي فوري اسپري، مڇردانيون ۽ ٻي گهربل ڄاڻ فراهم ڪئي وڃي.ڊپٽي ڪمشنر چيو ته ڊينگي کان بچاءَ لاءِ مڇر جي لاروا کي ختم ڪرڻ وارو عمل شروع ڪيو وڃي. ان مهم کي سنجيدگي ۽ هنگامي بنيادن تي شروع ڪرڻ جي هدايت ڪئي.