گلشن حديد ۾ پاڻي کوٽ خلاف بک هڙتالي ڪيمپ ٻئي ڏينهن به جاري، اڀ ڏاريندڙ نعرا

گلشن جديد جي مختلف بلاڪن ۾ ڪيترن ئي هفتن کان پاڻي جي فراهمي مڪمل طور بند آهي: اڳواڻ

ملير (رپورٽ: عبدالرشيد مورجھريو) گلشن جديد ۽ اسٽيل ٽائون ۾ پاڻي جي شديد کوٽ خلاف احتجاجي تحريڪ زور وٺي وئي آهي۔ علائقي جي رهواسين ۽ سماجي تنظيمن پاران لڳايل بک هڙتالي ڪيمپ ٻئي ڏينهن به جاري رهيو، جنهن ۾ وڏي انگ ۾ مرد، بزرگ ۽ ٻار شرڪت ڪئي۔ مظاهرين جي هٿن ۾ بينر ۽ پلي ڪارڊ هئا جهن تي لکيل هو: پاڻي اسان جو حق آهي پاڻي ڏيو، زندگي ڏيو، ۽ نااهل انتظاميا نامنظور۔شرڪت ڪندڙن جو چوڻ هو ته گلشن جديد جي مختلف بلاڪن ۾ ڪيترن ئي هفتن کان پاڻي جي فراهمي مڪمل طور بند آهي۔ بورنگ سڪي ويا آهن، واٽر ٽينڪر مافيا جي لوٽ مار عروج تي آهي، جڏهن ته انتظاميا جي بي حسي ماڻهن جي زندگي عذاب بڻائي ڇڏي آهي۔مظاهري ۾ شامل شهرين جو چوڻ هو ته علائقي ۾ موجود پاڻي جا ذخيرا انتظامي نااهلي ۽ ناقص منصوبا بندي سبب ضايع ٿي رهيا آهن، جنهن ڪري پورو علائقو ڪربلا جو منظر پيش ڪري رهيو آهي علائقي واسين الزام هنيو ته اسٽيل مل انتظاميا، واٽر بورڊ ۽ بلدياتي عملدارن ڪيترائي ڀيرا واعدا ڪيا پر عملي طور تي ڪو به قدم نه کنيو ويو۔ ٻي پاسي، مظاهري ۾ شريڪ بزرگ شهرين مطالبو ڪيو ته فوري طور تي پاڻي جي فراهمي بحال ڪئي وڃي ته جيئن گهريلو زندگي معمول تي اچي سگهي مظاهري ڪندڙن خبردار ڪيو ته جيڪڏهن ايندڙ 48 ڪلاڪن اندر پاڻي جي فراهمي بحال نه ڪئي وئي ته احتجاج کي وڌائي روڊ بند ڪري ۽ ڌرڻو هنيو ويندو