ٺٽي ۾ ڪلي جي ڳوٺ محمد رمضان کماڻ واسي جو نياڻي سان مبينا زيادتي خلاف احتجاج

عارف کماڻ منهنجي ذهني نوجوان نياڻي کي ورغلائي کڻي ويو هو، مهيني تائين ساڻس زنا ڪندو رهيو: پرين کماڻ

ٺٽو (شفيق ڀٽي)مڪلي لڳ ڪي ڊي اي موري جي ڳوٺ محمد رمضان کماڻ واسي پرين کماڻ عوامي پريس ڪلب ٺٽو ۾ دانهندي چيو آهي ته سندس درويش صفت، 35/30 سالا نياڻي شاھينه، جنهن جو دماغي توازن ٺيڪ نٿو رهي، کيس ڪجھ مهينا اڳ نالي عارب پٽ آغا کماڻ ڳوٺ مان ورغلائي کڻي هڪ مهينو گم ڪري زنا جو نشانو بڻائيندو رهيو۔سندس چوڻ موجب، اهڙي زيادتي بابت تر جي معتبر ڌرين کي پڻ شڪايتون ڪيون ويون، جنهن بعد هڪ مهينو زنا ڪرڻ کان پوءِ ساڳيو ملزم پنهنجي ڀائرن روشن کماڻ، محرم کماڻ ۽ ٻين جي مدد سان درويش صفت نينگري کي ڪورٽ ۾ شادي ڪرڻ لاءِ کڻي آيو۔ اسان به ڪورٽ ۾ پهتاسين ته نياڻي اسان کي ڏسي رڙيون ۽ گهوڙا گهوڙا ڪئي، جنهن بعد جوابدار موقعي تان ڪورٽ مان فرار ٿي ويا۔ان واقعي کان پوءِ اسان نينگري کي وٺي حد جي ٿاڻي تي مذڪوره ماڻهن مٿان زنا جو ڪيس داخل ڪرايو، پر پوليس صرف هڪ جوابدار کي گرفتار ڪيو، جڏهن ته مک جوابدار عارب توڙي ٻين فرار ٿيل ماڻهن خلاف پوليس جي بروقت ۽ مؤثر ڪارروائي نه ڪرڻ سبب هاڻي جوابدار هيسائي رهيا آهن۔پرين کماڻ جو وڌيڪ چوڻ هو ته نينگري جو ميڊيڪل پڻ ڪرايو ويو، جنهن ۾ ليڊي ڊاڪٽر پڻ زنا جي تصديق ڪئي ۽ ٻڌايو ته نينگري جي پيٽ ۾ ٻار پڻ آهي، پر ان جي باوجود پوليس اڃا تائين جوابدارن کي گرفتار نه ڪري سگهي آهي۔هن چيو ته جوابدار ڌر هاڻي ڪيس تان هٿ کڻڻ لاءِ دٻاءُ وجهڻ سان گڏ نينگري کي ٻيهر اغوا ڪرڻ جون ڌمڪيون ڏئي رهي آهي۔ هن ايس ايس پي ٺٽو ۽ ڊي آءِ جي حيدرآباد کان مطالبو ڪيو آهي ته زنا ڪيس ۾ ملوث عارب کماڻ سميت سمورن جوابدارن کي فوري طور گرفتار ڪري کيس تحفظ ۽ انصاف فراهم ڪيو وڃي۔