سڄي سنڌ جيان ملير ضلعو به ثقافتي رنگن ۾ رڱجي ويو، تقريب منعقد

ملير جي مختلف علائقن ۾ ثقافتي ريليون، جلوس، گڏجاڻيون ۽ موسيقيءَ جا رنگارنگ پروگرام منعقد ٿيا

ملير (رپورٽ: عبدالرشيد مورجھريو) سڄي سنڌ سان گڏ ڪراچي ۽ ملير ضلعو به اڄ سنڌي ثقافت جي ڏينهن تي سراسر ثقافتي رنگن ۾ رنگجي ويو. ضلعي جي روڊن، چوراهن، گهٽين ۽ اوطاقن ۾ اجرڪن ، ٽوپين، پٽڪن ۽ سنڌي نغمن جي گونج سان جشن جو ماحول مليو.ملير جي مختلف علائقن ۾ ثقافتي ريليون، جلوس، گڏجاڻيون ۽ موسيقيءَ جا رنگارنگ پروگرام منعقد ٿيا، جن ۾ ٻارن، نوجوانن، عورتن ۽ بزرگن وڏي تعداد ۾ شرڪت ڪئي. سنڌي لباس، اجرڪون ۽ پٽڪا پائڻ وارن شرڪت ڪندڙن پنهنجي ثقافتي ورثي لاءِ ڀرپور جذبو ظاهر ڪيو. ان سلسلي ۾ عوامي پريس ڪلب ملير ۽ سنڌي ادبي سنگت ملير پاران گڏيل ثقافتي تقريب منعقد ڪئي وئي، جنهن ۾ پريس ڪلب هال کي اجرڪن ،ٽوپين ، گلن ۽ سان سينگاريل پسمنظرن سان ڀرپور ثقافتي ڏيک ڏنو ويو.تقريب سنڌ جي وحدت تي وار نامنظور جي عنوان هيٺ لطيف جي وائي سان شروع ٿي تقريب جي شروعات ۾ ثقافتي عيد جي موقعي تي ڪيڪ ڪٽيو ويو تقريب ۾ آيل مهمانن کي پريس ڪلب جي صدر جمشيد زھراڻي ڀليڪار ڪيو تقريب ۾ قومي فنڪارن عبدالخالق ڀٽي ۽ سرفراز سومرو پنهنجي سريلي آواز ۽ روايتي دُهنن سان ماحول کي وڌيڪ پرجوش ڪري ڇڏيو. سندن گيتن تي نوجوانن ۽ ٻارن پاران جهمريون، تالين ۽ نعرا تقريب کي جشن واري رنگ ۾ بدلائي ڇڏيو.تقريب غفور شاه تقوي، سڪندر سرواڻ، اصغر مھرائي، عبدالغفار عبد،مظهر ورياڻي قومي شاعري ٻڌائي ان موقعي تي تقريب کي خطاب ڪندي سماجي اڳواڻ خدا ڏنو شاه، قومي عوامي تحريڪ جي اشفاق چنر،عوامي تحريڪ جي رستم ميراڻي، سماجي اڳواڻ عرفان عباسي، رستم لڪ،سامي ميمڻ،جيئي سنڌ محاذ فيض سنڌي ،ايس يو پي جي شيراز سولنگي ۽ ٻين چيو ته سنڌي ثقافت جو ڏينهن رڳو جشن نه پر پنهنجي سڃاڻپ، زبان ۽ هزارين سالن جي پراڻي تهذيب کي زنده رکڻ جو عزم آهي. هنن چيو ته اجرڪ، ٽوپي ۽ پٽڪو سنڌي عوام جي قومي غيرت ۽ ڌرتيءَ سان محبت جو نشان آهن.مقررین جو چوڻ هو ته سنڌ جي ثقافت انسانيت، محبت ۽ امن جو پيغام آهي، جيڪو دنيا جي هر ڪنڊ تائين پکڙجي ويو آهي. هنن چيو ته رستن تي نڪرندڙ لکين ماڻهن جو جذبو سنڌ جي وحدت ۽ بقا جي جدوجهد جي علامت آهي.