ٽالھي مان اغوا ڄاڻايل ناري جو ڪيس داخل، وارثن جو احتجاجي مظاهرو

2ھفتا اڳ ڳوٺ غلام قادر چانڊيو ۾ جوابدار گهر ۾ گهڙي ڌيءَ وسنتي کي اغوا ڪري ويا هئا: مگھو ڪولهي

عمرڪوٽ(ڊ ر) ٽالھي مان ٻه ھفتا اڳ مبينا اغوا ڄاڻايل ناري جو پتو نه پيو، چئن ڄڻن خلاف اغوا جو ڪيس داخل، ناري جي وارثن جو احتجاجي مظاهرو، نعريبازي ڪري نوٽيس جو مطالبو. تفصيل موجب ڪنري ويجھو ٽالھي ٿاڻي جي حد ۾ ڳوٺ غلام قادر چانڊيو مان ٻه ھفتا اڳ مبينا اغوا ڄاڻايل ناري وسنتي ڌيءِ مگھو ڪولهي جو پتو نه پئجي سگهيو، ناري جي پيءُ مگھو ڪولھي تي فرياد تي ٽالھي ٿاڻي تي چار جوابدارن روپچند ڪولھي، پريم، رتنو ۽ ھڪ اڻسڃاتل جوابدار خلاف اغوا جو ڪيس داخل ڪيو ويو، ٻه هفتا گذرڻ باوجود ناري جو پتو نه پوڻ ۽ جوابدار گرفتار نه ٿيڻ خلاف ناري جي وارثن نيشنل پريس ڪلب ڪنري آڏو احتجاجي مظاهرو ڪري نعريبازي ڪئي، ناري جي والد مگهو ڪولھي، ماءُ پاري، ڀڳوان داس ڪولھي ۽ ٻين صحافين آڏو دانھيندي چيو تہ هفتا اڳ جوابدار روپچند، پريم، رتنو ۽ ٻين اسان جي گهر ۾ داخل ٿي اسان جي ناري کي اغوا ڪري کڻي ويا آھن، ٻہ ھفتا گذرڻ باوجود پوليس ڪک ڀڃي ٻيڻو ناهي ڪيو، خبر ناهي نياڻي ڪھڙي حال ۾ هوندي، هنن چيو ته جوابدارن کي گرفتار نٿو ڪيو وڃي، پوليس ۽ بااثر ملوث آھن، معزز ماڻھن کي دانھن ڏني پر ڪوبه داد رسي نه ٿي ۽ الٽو ڪيس تان هٿ کڻائڻ لاءِ ڌمڪائي پيو وڃي، هنن آئي جي سنڌ، ڊي آئي جي ميرپورخاص ۽ ٻين کان مطالبو ڪيو ته فوري طور ناري کي بازياب ڪرائي ملوث ماڻھن خلاف ڪاروائي ڪئي وڃي، ٻي پاسي ٽالھي پوليس جو چوڻ آھي ته ناري جي اغوا جو ڪيس داخل ڪيو آھي ۽ جانچ ڪريون پيا اطلاع آهن ته ناري پسند جو پرڻو ڪري ڇڏيو آھي.