ڪراچي جي مھراڻ ڳوٺ ۾ قومپرست اڳواڻ ڪامريڊ الطاف مگسي جي پهرين ورسي ملهائي وئي

ايس يو پي جي سينئر نائب صدر روشن علي ٻرڙو، ڪراچي ڊويزن صدر ڊاڪٽر علي نواز گبول ۽ ٻيا شريڪ

ملير (رپورٽ: عبدالرشيد مورجھريو) ڪراچي جي مھراڻ ڳوٺ ۾ قومپرست اڳواڻ ليکڪ ۽ انسان دوست ڪامريڊ الطاف مگسي جي پهرين ورسي جي موقعي تي، مهراڻ ڳوٺ، ڪراچي ۾ سندس ڀائرن ۽ خاندان پاران هڪ پروقار تقريب منعقد ڪئي وئي، جنهن ۾ قومي، سياسي ۽ سماجي اڳواڻن سميت وڏي تعداد ۾ ماڻهن شرڪت ڪئي.تقريب کي خطاب ڪندي سنڌ يونائيٽيڊ جي سينئر نائب صدر روشن علي برو، ڪراچي ڊويزن صدر ڊاڪٽر علي نواز گبول ، سردارزاده مير صفدر خان مگسي، قومي عوامي تحريڪ جو مرڪزي اڳواڻ ڪاشف خاصخيلي، ايس ٽي پي اڳواڻ اعجاز سامٽيو، ڪامريڊ الطاف مگسي جي ڀاءُ منير خان مگسي ۽ ٻين مقررين چيو ته ڪامريڊ الطاف مگسي نه رڳو هڪ قوم پرست اڳواڻ هو پر پيار، ڀائيچاري ۽ انسان دوستي جو مجسمو به هو. هو ماڻهن کي ڳنڍڻ، انهن ۾ اتحاد، ڀائيچاري ۽ شعور پيدا ڪرڻ جي هڪ روشن مثال هو. هن پنهنجي لکڻين ۽ تقريرن ذريعي پاڪستان ۾ سماجي عدم مساوات، قومي حقن ۽ سنڌ جي سڃاڻپ بابت هڪ مضبوط ۽ دلير آواز بلند ڪيو.اڳواڻن وڌيڪ چيو ته الطاف مگسي سنڌ جي رهواسين جي آبادڪاري، انهن جي حقن جي آگاهي ۽ قومي شعور کي مضبوط ڪرڻ لاءِ ڪراچي ۾ مسلسل سرگرم رهيو. سندس خيالن، خدمتن، همت ۽ خلوص کي ڪراچي جي سڀني قومي حلقن ۾ عزت ۽ فخر سان ياد ڪيو ويندو آهي. تقريب جي آخر ۾ ڪامريڊ الطاف مگسي جي ابدي سڪون لاءِ دعا گهري وئي، جڏهن ته سندس خاندان سڀني شرڪت ڪندڙن جو دل جي گهراين سان شڪريو ادا ڪيو.