جنگشاهي ويجهو باهه لڳڻ سبب 18 پورهيتن جا ڪکاوان گهر سڙي رک

متاثرن ۾ عبدالڪريم عرف پليجو، عزير پليجو، شفيع پليجو،گل محمد، محمد شريف، اشرف ۽ ٻيا شامل

ٺٽو(شفيق ڀٽي) جنگشاھي لڳ ڳوٺ حاجي گل محمد پليجو ۾ باهه لڳڻ ڪري 18 ڪچا گهر سڙي خاڪ، لکين رپين جو نقصان. تفصيل موجب جنگشاھي، ديھ ھاليجي جي حدن ۾ واقع ڳوٺ حاجي گل محمد پليجو ۾ اوچتو باهه لڳڻ سبب 18 ڪچا گهر مڪمل طور سڙي خاڪ ٿي ويا، گهر ڀاتي معجزاڻي طور محفوظ، نتيجي ۾ لکين رپين جو مالي نقصان ٿي ويو. باهه لڳڻ سبب گهرن ۾ پيل هنڌ، بسترا، کٽون، ڪپڙا، ٿانوَ ۽ ٻين روزمره استعمال جي شين سميت قيمتي سامان سڙي ختم ٿي ويو. متاثر ڪٽنب هن وقت کليل آسمان هيٺ سخت پريشان ۽ بي يارو مددگار ويٺل. باهه متاثر ٿيل ڳوٺاڻان جن ۾ عبدالڪريم عرف پليجو، عزير پليجو، شفيع پليجو،گل محمد، محمد شريف، اشرف ۽ ٻيا شامل آھن جن جا گهر مڪمل طور سڙي خاڪ ٿي ويا.متاثر ڳوٺاڻن جو چوڻ آهي ته اسان غريبن جي سڄي حياتي جون جمع پونجيون باھ لڳڻ ڪري سڙي خاڪ ٿي ويو آهن. باھ متاثر ڳوٺاڻن حڪومت سنڌ، ڊپٽي ڪمشنر ٺٽو ۽ ٻين لاڳاپيل ادارن کي اپيل ڪندي گهر ڪئي آھي ته اسان جي مالي مدد ڪئي وڃي جيئن اسان ٻيهر پنهنجا اجها ٺاهي سگهون ۽ اسان جا کليل آسمان هيٺ ويٺل ٻچا سرديءَ توڙي گرميءَ کان محفوظ رهي سگهن.