سنڌ جي ڌرتيءَ جي سونهن ۽ ثقافت عورتن جي هٿن جي مهارت سان جڙيل آهي: راجوير سنگھ سوڍو

ڪراچي ۾ شيؤلوشن 2.0 ڪانفرنس منعقد، راجوير سنگھ سوڍو خاص مهمان طور شريڪ

عمرڪوٽ (رپورٽ:ڪانجي مل رکيسر) هُنرڪارن عورتن جي ترقي، بااختياري ۽ سندن دستڪاري کي قومي ۽ بين الاقوامي سطح تي متعارف ڪرائڻ لاءِ شيؤلوشن 2.0 ڪانفرنس ۽ ايگزيبيشن هاسپيٽل ميرئيٽ ڪراچي ۾ شاندار نموني منعقد ڪئي ويئي، جنهن ۾ معزز راجوير سنگھ سوڍو، خاص معاون وزيراعليٰ سنڌ براءِ انساني حقون خاص مهمان طور شرڪت ڪري افتتاحي ۽ اهم خطاب ڪيو، هي ايونٽ وومين چيمبر آف ڪامرس اينڊ انڊسٽري ڪورنگي، UNIDO، ۽ جرمني جي فيڊرل ريپبلڪ جي مشن جي گڏيل اهتمام هيٺ منعقد ٿيو، جنهن ۾ سڄي سنڌ مان 17 هٿرادو نيٽ ورڪ ۽ عورت هُنرڪارن پنهنجا اسٽال لڳايا، تقريب ۾ صاحبزادي مَهين خان (باني ۽ چيئرمين WCCIK)، بدرالاسلام (قومي ڪوآرڊينيٽر UNIDO)، ۽ PAIDAR نيٽ ورڪ جا نمائندا پڻ موجود هئا، ان موقعي تي راجوير سنگھ سوڍو چيو ته سنڌ جي ثقافت عورتن جي هنر سان روشن آهي، سنڌ جي ڌرتيءَ جي سونهن ۽ ثقافت عورتن جي هٿن جي مهارت سان جڙيل آهي، هن خاص طور تي ذڪر ڪيو ته سنڌ جي مختلف علائقن جون عورتون شاندار ڪڙهائي، رلي، ۽ دستڪاري شيون تيار ڪن ٿيون، پر ٿرپارڪر ۽ عمرڪوٽ جون عورتون پنهنجي رلي سازي، ڪڙهائي ۽ لوڪ فن جي ناياب مهارت سبب خاص سڃاڻپ رکن ٿيون، جيڪي وڌيڪ فروغ جي حقدار آهن، هن ٻڌايو ته چيئرمين پي پي پي بلاول ڀٽو زرداري ۽ وزيراعليٰ سنڌ سيد مراد علي شاهه جي هدايتن تحت انساني حقن وارو کاتو پوري صوبه ۾ عورتن لاءِ ڪيترائي ADP اسڪيمون عورتن جي بااختياري لاءِ لاڳو ڪيون پيون وڃن، راجوير سنگھ سوڍو چيو ته حڪومت جو مقصد آهي ته سنڌ جي هر هُنرمند عورت کي اقتصادي سهڪار، تحفظ ۽ واڌاري جا مڪمل موقعا فراهم ڪيا وڃن، جيئن هوءَ پنهنجي هنر کي مارڪيٽ تبديليءَ ۾ آڻي سگهي، ڪانفرنس ۾ هُنرڪارن جي شاندار شيون ڏسي شرڪت ڪندڙن طرفان واکاڻ ڪئي وئي ۽ عورتن جي معاشي ڀلائي لاءِ وڌيڪ عملي قدم کڻڻ جو عهد ورجايو ويو.