27هين آئيني ترميم وسيلي قانون ۽آئين کي ردي جي ٽوڪري ۾ اڇلايو ويو آهي: لال جروار

مسلم ليگ ن ۽ پيپلزپارٽي ھائبرڊ مارشلا کي قانوني شڪل ڏئي ڇڏي آھي: عوامي تحريڪ جو اڳواڻ

نوشھروفيروز(ڊ ر) 27ھين ترميم عوامي تحريڪ جي مرڪزي رابطا سيڪريٽري لال جروار پڊعيدن پريس ڪلب تي پريس ڪانفرنس ڪندي ٻڌايو ته 27 آئيني ترميم وسيلي،صدر، وزيراعظم ۽ فيلڊ مارشل کي تاحيات مراعتون ڏيڻ جو مقصد ملڪ ۾ قانون ۽آئين کي ردي جي ٽوڪري ۾ اڇلائي شھنشاھي نظام لاڳو ڪرڻ برابر آھي. ھن وڌيڪ ڳالھائيندي ٻڌايو ته مسلم ليگ ن ۽ پيپلزپارٽي ھائبرڊ مارشلا کي قانوني شڪل ڏئي ڇڏي آھي.ٻئي حڪمران پارٽيون اسٽيبلشمينٽ جون وفادار ۽ سھولتڪار آھن ٻنھي اقتداري پارٽين 25 ڪروڙ عوام سان ويساھ گھاتي ڪري عوام جي نمائندگي ڪرڻ جو حق وڃائي چڪيون آھن. 27ھين آئيني ترميم وسيلي سنڌ جي معدني وسيلن تي قبضو ڪري سنڌ جي وجود تي وار ڪيو ويندو. عدالتن جا اختيار ختم ڪري انصاف جو جنازو ڪڍيو ويو آھي. ھن چيو ته 27ھين آئين ترميم جي حمايت ڪندڙ ملڪ جي باني محمد علي جناح جي بنيادي اصولن ۽ 25 ڪروڙ عوام سان ويسا گھاتي ڪرڻ برابر آھي. .پاڪستان جي خالق صوبي سنڌ جي پنجن ھزارن سالن جي تاريخ ۽ سنڌي قوم جو نالو نشان ختم ڪري ڌرتي ڌڻين کي پنھنجي ئي وطن ۾ بي وطن ڪرڻ جي مجرمانه منصوبابندي ڪئي پئي وڃي. اڳواڻن چيو ته 27هين آئيني ترميم خلاف 16 نومبر تي سنڌياڻي تحريڪ طرفان حيدرآباد ۾ عظيم الشان پرامن احتجاجي مارچ ڪيو ويندو. سنڌ جي گھڻگھرن کي اپيل ڪئي آھي ته وڌ کان وڌ مارچ ۾ شرڪت ڪري قومي ٻڌي جو ثبوت ڏين.