سنڌو درياءَ تي ٺٽو-سجاول پل وٽ قائم ڪوسٽ گارڊ جي عارضي چيڪ پوسٽ تي وڏي ڪارروائي

سنيپ چيڪنگ دوران ٽرڪ مان وڏي مقدار ۾ غيرقانوني سپاري هٿ ڪري هڪ ڄڻو کي حراست ۾ ورتو ويو: ڪوسٽ گارڊ عملو

ٺٽو (شفيق ڀٽي) درياءِ سنڌ تي ٺٽو-سجاول پل وٽ قائم ڪوسٽ گارڊ جي عارضي چيڪ پوسٽ تي وڏي ڪارروائي عمل ۾ آندي وئي، جنهن دوران اسمگلنگ جي هڪ وڏي ڪوشش ناڪام بڻائي وئي۔ سنيپ چيڪنگ دوران ٽرڪ مان وڏي مقدار ۾ غيرقانوني سپاري هٿ آئي، جڏهن ته ٽرڪ ۽ هڪ شڪي شخص کي به حراست ۾ ورتو ويو۔ڪوسٽ گارڊ جي ترجمان مطابق خفيه اطلاع تي ڪراچي کان سجاول ويندڙ ٽرڪ نمبر AE-1966 کي روڪيو ويو، جنهن جي تلاشي دوران آٽي جي ٿيلن ۾ لڪل اسمگل ٿيل سپاري هٿ آئي۔ ڳجهي طريقي سان رکيل 100 کان وڌيڪ ٿيلن مان ڀريل سپاري جا ٿيلها برآمد ڪيا ويا، جن جي مارڪيٽ ۾ وڏي ماليت ٻڌائي پئي وڃي۔ڪوسٽ گارڊ موجب گرفتار ڪيل شڪي شخص کي وڌيڪ جاچ لاءِ لاڳاپيل اختيارين حوالي ڪيو ويو آهي، جڏهن ته سپاري جي اصل مالڪ ۽ نيٽ ورڪ تائين پهچڻ لاءِ جاچ جاري آهي۔ترجمان وڌيڪ چيو ته ڪوسٽ گارڊ طرفان منشيَات، غيرقانوني واپار ۽ اسمگلنگ جي روڪٿام لاءِ آپريشن جاري آهن ۽ اهڙن عنصرن خلاف بنا ڪنهن فرق جي سخت ڪارروائي ڪئي ويندي۔