ٺٽو: بااثرن هٿان تشدد ۽ تذليل جو شڪار ٿيل نوجوان هٿياربندن جي فائرنگ ۾ قتل، ڪيس داخل

جهمپير ويجهو ميٽنگ ريلوي اسٽيشن ڀرسان مال جي وٿاڻ وٽ ستل شير جماري کي هٿياربند قتل ڪري فرار

ٺٽو(محمد شفيق ڀٽي)گذريل رات جهمپير ويجهو ميٽنگ ريلوي اسٽيشن ڀرسان مال جي وٿاڻ وٽ ستل حالت ۾ هٿياربندن جي فائرنگ سبب ملاڪاتيار واسي نوجوان ڌنار شير جماري قتل ٿي ويو.واقعي جو ڪيس جهمپير ٿاڻي تي مقتول جي سئوٽ جُمن جماري جي فرياد تي قلم 302، 506، 114 ۽ 34 پي پي سي تحت داخل ڪيو ويو، جنهن ۾ پالاري برادري جا پنج جوابدار ــ صدر پالاري، رحمان پالاري، نور حسن پالاري، محرم پالاري ۽ پيارو پالاري ــ کي نامزد ڪيو ويو.ياد رهي ته مقتول شير جماري کي ٻه هفتا اڳ مبينا طور کنڀي تشدد جو نشانو بڻايو ويو ۽ سندس تذليل ڪندڙ وڊيوز به وائرل ڪيون ويون هيون، جنهن کانپوءِ وارثن ساڳين جوابدارن تي قتل جو شڪ ظاهر ڪيو هو.ايس ايس پي ٺٽو فاروق بجاراڻي واقعي جو نوٽيس وٺندي ايس ايڇ او جهمپير امير بخش کوسو کي ڪارروائي لاءِ هدايتون جاري ڪيون. پوليس جهمپير، نوري آباد ۽ ميٽنگ وارن علائقن ۾ ڇاپا هڻي ٽن مُک جوابدارن ــ صدر پالاري، پيارو پالاري ۽ رحمان پالاري ــ کي گرفتار ڪري ورتو، جڏهن⁠ ته واقعي واري هنڌ تان فائر ٿيل پسٽل جو خول به هٿ ڪيو ويو.ابتدائي جاچ دوران جوابدارن اعتراف ڪيو ته مقتول سندن مٿان ٻڪريون چوري ڪرڻ جو الزام هنيو هو، جنهن تي پهريان کيس تشدد ڪري تذليل جو نشانو بڻايو ۽ پوءِ قتل ڪيو.ابتدائي پوسٽ مارٽم ۾ پڻ تصديق ٿي آهي ته مقتول جي موت جو سبب کيس پٺن ۾ لڳل گولي هئي، جيڪا آرپار ٿي وئي. وڌيڪ جاچ جاري آهي.