ٺٽو: جهرڪ ويجهو بي آءِ ايس پي عملي کان 40 لک رپيا مبينا ڦر

اڻڄاتل هٿياربندن گاڏي جي رستي روڪ ڪري هٿيارن جي زور تي يرغمال بڻايو: امير بخش خاصخيلي

ٺٽو( محمد شفيق ڀٽي)جهرڪ جي علائقي شيخ سومار جي ويجهو اهو بدامنيءَ جو وڏو واقعو تڏهن پيش آيو، جڏهن بينظير انڪم سپورٽ پروگرام جو عملو، امير بخش خاصخيلي، پنهنجي گاڏي ۾ چاليهه لک رپيا کڻي سينٽر ڏانهن وڃي رهيو هو۔رپورٽن موجب، ٽي موٽر سائيڪل سوار هٿياربند ماڻهن سندس گاڏي کي روڪي، هٿيارن جي زور تي رقم ڦري، موقع تان فرار ٿي ويا۔اطلاع ملندي ئي جهرڪ پوليس، اونگر پوليس ۽ ڊي ايس پي جهرڪ واقعي واري هنڌ پهتا، جڳھ جو جائزو ورتو ۽ متاثر ٿيل عملي جو بيان قلمبند ڪيو۔پوليس اختيارين موجب، واقعي جي جاچ لاءِ هڪ خاص ٽيم ٺاهي وئي آهي، جڏهن ته علائقي ۾ سرچ آپريشن به شروع ڪيو ويو آهي۔ پوليس اميد ظاهر ڪئي آهي ته جلد ئي جوابدار گرفتار ڪري ڦريل رقم واپس حاصل ڪئي ويندي۔واقعي کان پوءِ BISP سينٽر کي عارضي طور بند ڪيو ويو آهي، جنهن سبب مستحق عورتن کي مالي امداد حاصل ڪرڻ ۾ ڏکيائين کي منهن ڏيڻو پيو آهي۔واضح رهي ته بينظير انڪم سپورٽ پروگرام ملڪ ڀر ۾ لکين غريب خاندانن کي مالي سهائتا فراهم ڪري رهيو آهي، پر اهڙا واقعا نه صرف اداري جي ساک کي متاثر ڪري رهيا آهن پر عوام جي اعتماد کي به ڌڪ پهچائي رهيا آهن۔