ملير: سينئر صحافي ۽ نجي ٽي وي چينل جي اينڪرپرسن امتياز مير جي قائدآباد ۾ جنازي نماز ادا، مقامي قبرستان ۾ تدفين

ملير (ڊ ر) نجي ٽي وي چئنل جي اينڪر پرسن ۽ سينيئر صحافي امتياز مير جي جنازي نماز ملير جي علائقي قائدآباد ۾ ادا ڪرڻ بعد مقامي قبرستان ۾ تدفين ڪئي وئي، جنازي نماز ۾ صوبائي صلاحڪار، ايم پي ايز، سنڌ اسيمبلي ۾ مخالف ڌر جي اڳواڻ، ڊپٽي ميئر ڪراچي، صحافين ۽ علائقي واسين وڏي انگ ۾ شرڪت ڪئي، امتياز مير جي شهادت هڪ سانحو آهي سندس قاتل جلد کان جلد گرفتار ڪيا ويندا: صوبائي صلاحڪار، خبر موجب: نجي ٽي وي چئنل جي اينڪر پرسن ۽ سينيئر صحافي امتياز مير جي جنازي نماز ملير جي علائقي قائدآباد ۾ ادا ڪئي وئي، جنازي نماز ۾ صوبائي صلاحڪار محمد سليم بلوچ، سنڌ اسيمبلي ۾ مخالف ڌر جي اڳواڻ علي خورشيدي، ڊپٽي ميئر ڪراچي سلمان عبدالله مراد، اڳوڻي صوبائي وزير امتياز شيخ، لعل چند اڪراڻي، ايم پي اي نجم مرزا، ايم ڪيو ايم اڳواڻ اشفاق منگي، چيئرمين ملير ٽائون جان محمد بلوچ، راول شرجيل ميمڻ، سي اي او ميٽرو ون ۽ چيئرمين ڪيپ خالد آرائين سميت سينيئر صحافين ۽ علائقي واسين وڏي انگ ۾ شرڪت ڪئي، ان موقعي تي صحافين سان ڳالهائيندي صوبائي صلاحڪار محمد سليم بلوچ چيو ته امتياز مير هڪ بهادر انسان هو سرڪار امتياز مير جي خاندان جي ڏک ۾ برابر جي شريڪ آهي سندس قاتل تمام جلد گرفتار ڪيا ويندا، سنڌ اسيمبلي ۾ مخالف ڌر اڳواڻ علي خورشيدي چيو ته امتياز مير جي عيادت وقت مان جڏهن اسپتال ويو هئس ته مسڪرائي رهيو هو امتياز مير تي حملي ۾ ملوث ملزمن کي گرفتار ڪري قانون جي ڪٽهڙي ۾ آندو وڃي هن ڏک جي گهڙي ۾ اسان امتياز مير جي وارثن سان گڏ آهيون اسيمبلي ۾ قاتلن جي گرفتاري لاءِ آواز اٿارينداسين، ايم پي اي امتياز شيخ چيو ته امتياز مير جي شهادت هڪ سانحو آهي ان موقعي تي اسان خاندان سان ڏک ۾ برابر جا شريڪ آهيون سنڌ حڪومت قاتلن جي گرفتاري لاءِ قدم کڻي رهي آهي جلد قاتلن کي قانون جي ڪٽهڙي ۾ آندو ويندو. ڊپٽي ميئر سلمان عبدالله مراد چيو ته امتياز مير تي قاتلاڻو حملو ڪندڙ ملزمن کي جلد گرفتار ڪيو ويندو امتياز مير بهترين شخصيت جو مالڪ هو، چيئرمين ڪيبل آپريٽر ايسوسيئيشن خالد آرائين چيو ته آءِ جي سنڌ کان مطالبو آهي ته امتياز مير جي قاتلن کي گرفتار ڪيو وڃي هو هڪ محنتي ۽ ديانتدار شخصيت هو ڏک جي گهڙي ۾ اسان سندس خاندان سان گڏ آهيون، جنازي نماز بعد امتياز مير جو مڙهه خلده آباد قبرستان ۾ مٽي ماءُ حوالي ڪيو ويو.