حيدرآباد ۾ سنڌياڻي تحريڪ، قومي عوامي تحريڪ ۽ پٺاڻ ڳوٺ جي رهواسي عورتن ۽ ٻارن سان ٽرانسفارمر تبديل نہ ٿيڻ خلاف ڌرڻو

حيسڪو چيف آفيس حسين آباد سامھون مظاھرو ڪري ڌرڻو هنيو ويو

حيدرآباد: سنڌياڻي تحريڪ ،قومي عوامي تحريڪ ۽ پٺاڻ ڳوٺ گدو ناڪو حيدرآباد جي رهواسين عورتن ۽ ٻارن سان گڏجي 4 مھينن کان بجلي ٽرانسفارمر تبديل نہ ڪرڻ خلاف حيسڪو چيف آفيس حسين آباد سامھون مظاھرو ڪري ڌرڻو ھنيو. احتجاج جي اڳواڻي قومي عوامي تحريڪ جي سينيئر ڊپٽي جنرل سيڪريٽري الطاف خاصخيلي، ضلعي صدر نظير بليدي، جنرل سيڪريٽري معشوق چانڊيو، نائب صدر بابو ميمڻ علائقي جي رھواسين نذير لاکو، الطاف ڳاھو، منور پٺاڻ، جاويد لاشاري، الطاف ڳاھو ۽ ٻين ڪئي. ان موقعي تي قومي عوامي تحريڪ جي سينئر ڊپٽي سيڪريٽري الطاف خاصخيلي خطاب ڪندي چيو تہ حيسڪو سب ڊويزن شاھ لطيف جي ڪرپٽ آفيسرن علائقي ۾ پرائيويٽ ماڻھو مقرر ڪيا آھن، رشوت نہ ڏيڻ تي بجلي ڪاٽي ڇڏي آھي. سڙيل ٽرانسفارمر 4 مھينن کان تبديل نٿو ڪيو وڃي. قومي عوامي تحريڪ ضلعي حيدرآباد جي صدر نظير بليدي خطاب ڪندي چيو تہ حيسڪو چيف آفيس ۾ مختلف عملدارن سان ملاقاتون ڪيون آھن واعدا ڪرڻ باوجود پرائيويٽ ماڻھن جي چوڻ تي بجلي بحال نٿي ڪئي وڃي. جاويد لاشاري خطاب چيو تہ حيسڪو جا پرائيويٽ ماڻھو چون ٿا ته 3/3 ھزار ڏيو ته بجلي چالو ٿيندي. پوء ڀلي بل نہ ڏيو، توھان جي بجلي چالو ٿي ويندي. نظير لاکو خطاب ڪندي چيو تہ اسان جا بجلي جا ميٽر لڳل آھن، ان باوجود اسان کي بجلي فراھم نٿي ڪئي وڃي. جيستائين بجلي فراھم نہ ڪئي ويندي، اسان جو احتجاج جاري رھندو. بابو ميمڻ ۽ معشوق چانڊيو پڻ خطاب ڪيو