ملير: رزاق آباد جي غريب آباد ۾ گٽر اٿلي پيا، گندو پاڻي گهٽين ۽ گهرن ۾ داخل

انتظاميه گٽرن جي صفائي لاءِ ڪي قدم نه کنيا، گندو پاڻي بيهڻ سبب رهواسي سخت پريشان

ملير (رپورٽ: عبدالرشيد مورجھريو) رزاق آباد جي غريب آباد جي مختلف پاڙن گبول ، شيخ ، خميوسو ۽ ڪلمتي پاڙي ۾ سيوريج نظام جي تباھ حالي سبب گٽر اٿلي پيا آهن جنهن بعد گندو پاڻي رستن، گهٽين ۽ گهرن ۾ ڪاهي پيو آهي علائقي واسين جي زندگي عذاب بڻجي وئي آهي رهواسين فيض سنڌي، صدام ڪلمتي، منير شاھ، شيراز سولنگي، سعيد سولنگي، وهاب گبول ۽ ٻين جو چوڻ هو ته گندگي ۽ بدبودار پاڻي جي ڪري رهواسين ۾ ، مليريا، خارش ۽ گيسٽو جهڙيون بيماريون تيزي سان پکڙجڻ لڳيون آهن جڏهن ته بخار جا ڪيس به وڌي ويا آهن. مقامي ماڻهن جو چوڻ آهي ته ابراهيم حيدري جي مرڪزي آفيس لڳ ثريب آباد جو علاقو هجڻ باوجود ٽائون چيئرمين، يوسي چيئرمين، وائيس چيئرمين، ڪائونسلرز ۽ سمورا ميمبر عوامي مسئلن ڏانهن ڌيان ڏيڻ بجاءِ خاموش تماشائي بڻيل آهن.رهواسين جو چوڻ هو ته ننڍا ٻار، بزرگ ۽ عورتون بدترين تڪليفن کي منهن ڏئي رهيا آهن، جتي آمد و رفت ۾ پڻ شديد رڪاوٽون پيدا ٿي رهيون آهن. ماڻهن مطالبو ڪيو آهي ته فوري طور تي مين ڊسپوزل جي صفائي، ڪچرا ، سيوريج سسٽم جي بهتري ۽ مڇر مار اسپري مهم شروع ڪئي وڃي ته جيئن رهواسي موزي بيمارين کان بچي سگهن.رهواسين ٽائون چيئرمين ۽ يوسي چيئرمين کي اپيل ڪندي چيو آهي ته ووٽرن جي سار لهو ۽ بنيادي حقن کان وڌيڪ محروم نه ڪيو وڃي.