بھارت کے ناپاک عزائم پاکستان کی سلامتی کے لیے خطرہ ہیں: ڈی جی آئی ایس پی آر

راولپنڈی (ویب ڈیسک) ڈی جی آئی ایس پی آر لیفٹیننٹ جنرل احمد شریف چوہدری نے کہا ہے کہ بھارت نہ صرف پاکستان میں دہشت گرد کارروائیوں کی حمایت کر رہا ہے بلکہ مالی معاونت بھی فراہم کر رہا ہے، جبکہ بھارت دہشت گردی کو ریاستی پالیسی کے طور پر پاکستان کے خلاف استعمال کر رہا ہے۔ غیر ملکی میڈیا کو دیے گئے انٹرویو میں ڈی جی آئی ایس پی آر نے کہا کہ بھارت کے ناپاک عزائم پاکستان کی سلامتی، خاص طور پر بلوچستان کو غیر مستحکم کرنے کے لیے ایک منظم سازش ہیں۔ انہوں نے کہا کہ بھارتی سیاسی قیادت متعدد مواقع پر پاکستان میں دہشت گردی کی پشت پناہی کا اعتراف کر چکی ہے، جبکہ امریکہ اور کینیڈا سمیت کئی ممالک بھی بھارتی ریاستی دہشت گردی کا اعتراف کر چکے ہیں۔ بھارت کی سرپرستی میں ہونے والے دہشت گردی کے نیٹ ورک کا ماسٹر مائنڈ اجیت دوول ہے۔ لیفٹیننٹ جنرل احمد شریف چوہدری نے کہا کہ پاکستان ایک ذمہ دار اور ڈیکلیئرڈ ایٹمی طاقت ہے، جس کی جوہری صلاحیت مکمل طور پر محفوظ اور ناقابل شکست ہے۔ انہوں نے کہا کہ پاکستان کا ایٹمی پروگرام مکمل طور پر محفوظ ہے اور کوئی بھی ملک پاکستان کے ایٹمی پروگرام کو نقصان پہنچانے کی جرات نہیں کر سکتا۔ یہ پاکستان کی دفاعی صلاحیت اور خطے میں توازن پر اعتماد کی عکاسی کرتا ہے۔ ڈی جی آئی ایس پی آر نے کہا کہ پاکستان کسی بھی جارحیت کو خطے کے استحکام کے لیے خطرہ سمجھتا ہے۔ اسلام میں جہاد یا جنگ کا اختیار صرف ریاست کے پاس ہے، کسی فرد، تنظیم یا گروہ کو اس کا اختیار نہیں۔ انہوں نے کہا کہ فتنے الخوارج کا اسلام، انسانیت، پاکستان یا پاکستانی روایات سے کوئی تعلق نہیں۔ پاکستانی فوج اور میڈیا میں ’خوارج‘ کی اصطلاح وسیع پیمانے پر استعمال ہو رہی ہے، جبکہ ’فتنہ ہندوستان‘ کی اصطلاح ان دہشت گردوں کے لیے استعمال کی جا رہی ہے جو بھارتی حمایت سے خاص طور پر بلوچستان میں ملک کو غیر مستحکم کرنے کی کوشش میں سرگرم ہیں۔ اس موقع پر ڈی جی آئی ایس پی آر نے ایک بار پھر ایران کے لیے پاکستان کی سیاسی اور سفارتی حمایت کے عزم کو بھی دہرایا۔