ملير: سيمينٽ فيڪٽري وٽ سيڪيورٽي گارڊ جي فائرنگ ۾ مبينا ڦورو مارجي ويو

ملير (رپورٽ: عبدالرشيد مورجھريو) پاڪ لينڊ سيمينٽ فيڪٽري لڳ مبينا ڦر جي ڪوشش دوران فيڪٽري جي سيڪيورٽي گارڊ جي فائرنگ ۾ هڪ هٿياربند مبينا ڦورو مارجي ويو. تفصيل موجب فيڪٽري جي عملدارن پاران اطلاع ملڻ تي اسٽيل ٽائون پوليس واقعي واري هنڌ پهچي 40 ورهين جي هڪ مبينا جوابدار مراد ولد مٺا جوکيو جيڪو پير سرہندي ڳوٺ جو رهواسي ٻڌايو وڃي ٿو جو لاش هٿ ڪيو پوليس مطابق واقعي واري هنڌ تي هڪ ڪار نمبر BZQ-258 به موجود هئي، جنهن ۾ ٽي ڄڻا اسدالله ولد عبدالعليم پنھور، دوست علي ولد محمد سفيان، ۽ صاحب خان عرف صابرالدين سوار هئا فيڪٽري جي سيڪيورتي انچارج اشفاق پوليس کي ٻڌايو ته موٽر سائيڪل تي سوار ٽن هٿياربند ڪار سوارن کان ڦر ڪرڻ جي ڪوشش ڪئي ان دوران گشت تي موجود فيڪٽري جي سيڪيورٽي گارڊن کين روڪڻ جي ڪوشش ته هٿياربندن فائرنگ شروع ڪري ڏني، جنهن تي سيڪيورٽي اهلڪارن پاران جوابي فائرنگ ڪئي جنهن جي نتيجي ۾ هڪ هٿياربند ڦورو مارجي ويو، جڏهن ته ٻه هٿياربند موٽر سائيڪل تي فرار ٿيڻ ۾ ڪامياب ٿي ويا. پوليس ڪار ۽ ان ۾ سوار ماڻهن کي حفاظتي تحويل ۾ وٺي ٿاڻي منتقل ڪري ڇڏيو، جڏهن ته مارجي ويل هٿياربند جي لاش کي قانوني ڪارروائي بعد جناح اسپتال موڪليو ويو. پوليس وڌيڪ جاچ جاري رکي آهي.