سنڌو درياءَ جي پاڻي تي ڌاڙو قبول ناهي، ڪمپنين حوالي ڪيل زمينون واپس ڪرايون وڃن: ڊاڪٽر نياز ڪالاڻي

عمرڪوٽ ۾ جسقم بشير قريشي پاران سنڌ دشمن منصوبن خلاف ريلي ۽ ڌرڻو

عمرڪوٽ (رپورٽ:ڪانجي مل رکيسر) سنڌ جي زرخيز زمينن کي سرمائيدارن حوالي ڪرڻ ۽ درياءِ سنڌ مان ڇھ ڪئنال ڪڍڻ خلاف عمرڪوٽ ۾ جيئي سنڌ قومي محاذ (جسقم) جي اڳواڻي ۾ هڪ شاندار احتجاجي ريلي ۽ تاريخي ڌرڻو هنيو ويو، احتجاج جي اڳواڻي ڊاڪٽر نياز ڪالاڻي، پنھل ساريو، سرفراز ميمڻ، جميل ڌونڪائي ۽ ٻين ڪئي، جن سان گڏ سياسي، ادبي، قانوني ۽ عوامي حلقن جا نمائندا وڏي انگ ۾ شريڪ ٿيا، ريلي بس اسٽاپ عمرڪوٽ تان رواني ٿي، جيڪا تھر بازار، پريس ڪلب عمرڪوٽ وٽان گذري ڊپٽي ڪمشنر آفيس تي پهتي، جتي مظاهرو ڪندڙن ڪلاڪن تائين ڌرڻو هنيو ۽ جوشيلي نعريبازي ڪئي، مظاهرين سنڌ حڪومت جي انهيءَ فيصلي جي سخت مذمت ڪئي، جنهن تحت عمرڪوٽ جي ٻن لک ايڪڙ زرعي زمين ڪمپنين حوالي ڪئي پئي وڃي، مظاهرين جو چوڻ هو ته اهي زمينون صدين کان سنڌي آبادگارن جي ملڪيت رهيون آهن، ۽ انهن تي قبضو ڪنهن به صورت ۾ قبول نه ڪيو ويندو، ڊاڪٽر نياز ڪالاڻي ڌرڻي کي خطاب ڪندي چيو تہ درياءِ سنڌ جو پاڻي صرف سنڌ جي ماڻهن جو آهي، اهي ڇھ ڪئنال مقامي آبادگارن جي پاڻي تي ڌاڙي جي سازش آهن، سنڌ جي زمين ۽ پاڻي تي قبضو، خود سنڌ جي سڃاڻپ تي حملو آهي، هن وڌيڪَ چيو ته سنڌ جا ماڻهون پنهنجي زمينن، وسيلن ۽ روزگار تي ڪنهن به قسم جي سوديبازي نه ڪندا، ۽ جيڪڏهن حڪومت پنهنجي روش نه بدلي ته سنڌ جي ڪنڊ ڪڙڇ ۾ تحريڪ هلائي ويندي، ان موقعي تي ٻين اڳواڻن پڻ خطاب ڪندي چيو ته ڇھ ڪئنال ڪڍڻ جو منصوبو خشڪ ساليءَ کان متاثر علائقن لاءِ موت جو سڏ آهي، زمين، پاڻي ۽ روزگار تي قبضو قبول نه ڪيو ويندو، مظاهرين مطالبو ڪيو ته عمرڪوٽ جي ٻه لک ايڪڙ زمين مقامي آبادگارن حوالي ڪئي وڃي، ڇھ ڪئنال وارو منصوبو فوري طور ختم ڪيو وڃي، سنڌ جا آبي وسيلا رڳو سنڌ جي آبادگارن لاءِ مخصوص ڪيا وڃن، مظاهرين خبردار ڪيو ته جيڪڏهن حڪومت ھوش جا ناخن نہ ورتا تہ هيءَ تحريڪ عمرڪوٽ تائين محدود نه رهندي،