تڪراري ڪئنالن ۽ ڪارپوريٽ فارمنگ خلاف 29جولاءِ تي عمرڪوٽ ۾ ريلي ڪڍي ڌرڻو هنيو ويندو: ڊاڪٽر نياز ڪالاڻي

جسقم بشير قريشي پاران پاڻي، زمين ۽ وسيلن تي ڌاڙي خلاف عمرڪوٽ ۾ ڌرڻي جو اعلان

عمرڪوٽ (رپورٽ:ڪانجي مل رکيسر) جسقم شھيد بشير خان قريشيءَ جي چيف آرگنائزر ڊاڪٽر نياز ڪالاڻي اعلان ڪيو آهي ته سنڌو درياهه تي ڇهن ڪئنالن جي تعمير ۽ ڪارپوريٽ فارمنگ جي نالي ۾ عمرڪوٽ سميت سنڌ جي لکين ايڪڙ زرعي زمين نجي ڪمپنين حوالي ڪرڻ خلاف 29 جولاءِ تي عمرڪوٽ ۾ وڏي ريلي ڪڍي ڊي سي آفيس آڏو ڌرڻو هنيو ويندو، جتي حڪومت کي سخت ڌيان ڏياريو ويندو، ڊاڪٽر نياز ڪالاڻي الزام لڳايو ته وفاقي حڪومت سنڌ سان واعدو خلاف ورزي ڪندي ننڍن ڊيمز جي اڏاوت ذريعي سنڌو درياهه تي ڪنٽرول حاصل ڪرڻ جي ڪوشش ڪري رهي آهي، جڏهن ته پنجاب حڪومت پنهنجي بجيٽ ۾ انهن ڪئنالن لاءِ فنڊ مختص ڪري ڇڏيا آهن، هن وڌيڪَ چيو ته سنڌ سرڪار ڪارپوريٽ فارمنگ جي اشو تي رڳو زباني جمع خرچ ڪري رهي آهي، 30 جون تائين وڪيلن سان گڏجاڻي جو واعدو پورو نه ڪيو ويو، ۽ صرف عمرڪوٽ ضلعي جي 1 لک 90 هزار ايڪڙ زرعي زمين نجي ادارن جي حوالي ڪئي وئي آهي، جيڪا سنڌ جي مستقبل سان وڏو ظلم آهي، ڊاڪٽر نياز ڪالاڻي چيو ته سنڌ سرڪار پ پ حڪومت جي سرڪار آهي، پر سنڌ جي اهم اشوز تي مڪمل خاموشي اختيار ڪئي وئي آهي، جيڪڏهن ڪارپوريٽ فارمنگ وفاقي اشو آهي ته سنڌ سرڪار رد ڇو نٿي ڪري؟ هن چيو ته سنڌ ۾ امن امان جي صورتحال انتهائي خراب ٿي وئي آهي، پوليس آفيسرن کي سياسي بنيادن تي لڳايو وڃي ٿو، ڪرپشن جو راڄ آهي ۽ ڌاڙيلن جا حڪم هلن ٿا، جڏهن ته ملڪ ٻوڏ واري حالت ۾ آهي، پر سنڌ ۾ زرعي پاڻي جي سخت کوٽ آهي، جيڪا هٿرادو طور پيدا ڪئي وئي آهي ته جيئن سنڌ جي زراعت کي تباهه ڪري نجي مفادن لاءِ زمينون خالي ڪرايون وڃن، جسقم اعلان ڪيو آهي ته 29 جولاءِ تي سنڌ جي وسيلن، درياهن، زمينن ۽ عوامي حقن لاءِ عمرڪوٽ جي رستن تي وڏي ريلي ڪڍي ڊي سي آفيس اڳيان ڌرڻو هنيو ويندو.