الميو آھي ته سنڌ ۾ موجود يونيورسٽين جو تعليمي معيار عالمي معيار وارو ناھي: اياز لطيف پليجو

حيدرآباد(بيورو)قومي عوامي تحريڪ جي سربراھ اياز لطيف پليجي چيو آهي تہ سنڌ جي ھر ضلعي ۾ آئي ٽي، ميڊيڪل، انجنيئرنگ، ايگريڪلچر يونيورسٽيز ٺاھي سنڌ جي نوجوانن ۽ نياڻين کي اعلي تعليم جا موقعا ڏنا وڃن. المناڪ صورتحال آھي تہ سنڌ ۾ موجود يونيورسٽين جو تعليمي معيار عالمي معيار وارو ناھي.موجود يونيورسٽين جي تعليمي معيار کي عالمي معيار مطابق بھتر بنائڻ گھرجي. اياز لطيف پليجي چيو تہ دنيا جا سڌريل ملڪ تعليم ۽ سائنس ذريعي اڳتي وڌيا آھن. سنڌ جا نوجوان پڙھڻ چاھين ٿا، اعلي تعليم چاھين ٿا پر سنڌ ۾ ايتريون يونيورسٽيز ناھن. گنجائش ناھي رکي وئي جنھنڪري ھر ضلعي ۾ ھزارين نوجوان اعلي تعليم کان رھجي وڃن ٿا. اياز لطيف پليجي چيو تہ حڪمران طبقي جا نوجوان اعلي تعليم لاءِ ٻاھرين ملڪن ۾ وڃن ٿا پر جيڪي حڪمران طبقي جا ناھن. امير ناھن. شاھوڪار ناھن، آھي صرف انڪري رھجي وڃن ٿا جو يونيورسٽين ۾ ايتري گنجائش ناھي. اياز لطيف پليجي چيو تہ سنڌ جي ھر ضلعي کي تعليمي مرڪز بنائڻ گھرجي. بھترين لائبرريون ٺاھڻ گھرجن. تعليم سان ئي سنڌ ترقي ڪندي ۽ ملڪ اڳتي وڌي سگھي ٿو. ڪرپشن ھر مسئلي جو بنياد آھي. جنھنڪري سان جو تعليمي نظام درھم برھم آھي.