ڪشمور ۾ جماعت اسلامي پاران اسرائيلي جارحيت خلاف احتجاجي ريلي

گڏيل قومن کي اسرائيلي جارحيت جو نوٽيس وٺندي فلسطينين سان انصاف ڪرڻ گھرجي: اڳواڻ

ڪشمور (دلبر جاني) ڪشمور جماعت اسلامي ڪشمور پاران جماعت اسلامي جي مرڪزي امير سراج الحق جي سڏ تي پوري پاڪستان جيان ڪشمور ۾ به اسرائيلي جارحيت خلاف لبيڪ يا غذا ريلي نادره چوڪ کان ڪڍي وئي ريلي شھر جي مختلف چوڪ چوراهن کان ٿيندي ڊسٽرڪٽ پريس ڪلب پهتي جتي ڪارڪنن ۽ شهرين پاران اسرائيلي جارحيت خلاف سخت احتجاجي مظاهرو ڪيو ويو احتجاجي ريلي جي اڳواڻي جماعت اسلامي ڪشمور جي مقامي امير افضل عطا ڪلوڙ ڪئي ريلي ۾ شريڪ احتجاج ڪندڙن هٿن ۾ پلي ڪارڊ کنيل هئا تنهن تي اسرائيل جي خلاف نعرہ درج هئا، احتجاجي مظاهري کي خطاب ڪندي جماعت اسلامي ڪشمور جي اڳواڻن افضل عطا ڪلوڙ حاجي عبدالفتح مولوي لطف الله جکراڻي خالد سيف الله منظور احمد چاچڙ، ذوالفقار علي ملڪ، رحيم بخش سولنگي، برڪت گل جکراڻي چيو ته گذريل 6 ڏينهن کان فلسطيني مظلوم مسلمانن تي اسرائيلي فوج جي غزہ تی ڪيميائي بمباري جاري آهي اسرائيلي بمباري جي نتيجي هن وقت تائين 1500کان مٿي فلسطيني شهيد ٿي ويا آهن ۽ 6هزار کان وڌيڪ شهري زخمي آهن شهيد ٿي ويل شهرين ۾ گهڻي تعداد عورتن ۽ معصوم ٻارڙن جي آهي جڏهن ته ٽي لک چاليھ هزار کان وڌيڪ شهري گهرن کان بي گهر ٿي چڪا آهن ۽ ٻئي طرف يهودي فوج غزا جي مظلوم شهرين جو پاڻي بجلي ۽ اينڌن پڻ بنڊ ڪري ڇڏيو آهي هن وقت مظلوم فلسطيني مسلمان تاريخ جي مشڪل ترين حالتن کان گذري رهيا آهن ظلمن ۽ جارحيت جو سلسلو هلندڙ آهي. اقوام متحده کي فلسطين جي اندر ھلندڙ مظلوم مسلمان فلسطينين جي رت نظر نٿي اچي. افسوس جي ڳالھ آھي ته 57 اسلامي ملڪ 22 لک کان مٿي فوجون هئڻ باوجود اسرائيلي غنڊا گردي کي منهن ٽوڙ جواب نہ پیو ڏنو وڃي. اهڙي صورتحال جي اندر مسلمانن کي پنهنجي صفن کي درست ڪري هڪ آواز ٿيڻ جي ضرورت آهي. جماعت اسلامي پاران پوري دنيا جي اندر رهندڙ مظلوم ۽ ستم رسيده مسلمانن جي حمايت جو سلسلو جاري ۽ ساري رهندو