ملير: شادي تقريب دوران هوائي فائرنگ ڪرڻ تي گهوٽ سميت 7 ڄڻا گرفتار

ملير (رپورٽ: عبدالرشيد مورجھريو) سُڪڻ پوليس شادي جي تقريب دوران هوائي فائرنگ ڪندڙ گهوٽ سميت 7 جوابدارن کي گرفتار ڪري ورتو پوليس موجب جوابدار هوائي فائرنگ ڪرڻ بعد واقعي واري هنڌ تان فرار ٿي ويا هئا.ايس ايڇ او سُڪڻ پوليس ٽيم سان گڏ ڪارروائي ڪندي ٿاڻي سُڪڻ جي حدن اندر ڀينس ڪالوني واري علائقي مان جوابدارن کي گرفتار ڪيو. گرفتار ٿيلن ۾ گهوٽ گل حسن، شهزيب، شهريار، زوهيب، عامر، عظيم ۽ شعيب شامل آهن.پوليس موجب جوابدارن کي گرفتار ڪرڻ دوران هنن مزاحمت ڪندي فرار ٿيڻ جي ڪوشش ڪئي، پر سُڪڻ پوليس بروقت ڪارروائي ڪري گهوٽ گل حسن سميت سڀني جوابدارن کي گرفتار ڪري ورتو. گرفتار جوابدارن جي قبضي مان هوائي فائرنگ ۾ استعمال ٿيل پسٽل، خالي خول ۽ گوليون هٿ ڪيون ويون آهن. پوليس جو چوڻ آهي ته جوابدار شادي جي تقريب دوران هوائي فائرنگ ۾ ملوث هئا، جنهن سبب شهرين جي جانين کي سخت خطرو لاحق ٿيو هو.گرفتار جوابدارن خلاف ضابطي موجب ڪيس داخل ڪري جاچ شروع ڪئي وئي آهي. پوليس موجب هوائي فائرنگ هڪ سنگين ۽ جان ليوا ڏوهه آهي، اهڙن عنصرن خلاف بنا ڪنهن فرق جي قانوني ڪارروائي جاري رکي ويندي ۽ قانون موجب سخت قدم کنيا ويندا.