ٺٽي ۾ منشيات خلاف جاڳرتا ريلي ڪڍي وئي، وڏي انگ ۾ شهري شريڪ

سول اسپتال مڪلي کان قومي شاهراھ تائين منشيات خلاف آگاهي ريلي ڪڍي وئي

ٺٽو(شفيق ڀٽي)ڊپٽي ڪمشنر سرمد علي ڀاڳت ۽ ايس ايس پي ساجد امير سدوزئي جي قيادت ۾ منشيات جي خاتمي لاءِ سول اسپتال مڪلي کان گورنمينٽ بوائز ڊگري ڪاليج مڪلي تائين آگاهي ريلي ۽ واڪ ڪيو ويو. ريلي ۾ روينيو، صحت، پوليس ۽ ٻين کاتن جي آفيسرن، ڊاڪٽر، ميڊيڪل اسٽاف، استادن ۽ سول سوسائٽي جي نمائندن ڀرپور شرڪت ڪئي. ريلي جو مقصد عوام کي گٽڪو، ماؤ ۽ ٻي منشيات جي نقصانن کان آگاه ڪرڻ هو. ڊپٽي ڪمشنر سرمد علي ڀاڳت ميڊيا سان ڳالهائيندي چيو ته اسان سڀني کي گڏجي منشيات کان پاڪ، صحت مند ۽ باشعور سماج قائم ڪرڻو پوندو. هن وڌيڪ چيو ته هي آگاهي مهم شهرين ۾ شعور اجاگر ڪرڻ لاءِ آهي ته جيئن اهي گٽڪو، ماؤ ۽ ٻي منشيات جي استعمال کان پاسو ڪن ۽ هڪ صحت مند سماج جي قيام ۾ پنهنجو ڪردار ادا ڪن. ايس ايس پي ساجد امير سدوزئي چيو منشيات کان انڪار، زندگي سان پيار اسان جو نعره هئڻ گهرجي. نوجوان نسل هن لعنت جو شڪار ٿي رهيو آهي، اسان کي گڏجي هن ناسور کي جڙ کان ختم ڪرڻو پوندو. منشيات هڪ زهريلو قاتل آهي، جيڪو انسان جي صحت، سوچ، ڪردار ۽ سماج کي تباهي ڏانهن وٺي وڃي ٿو. هن وڌيڪ چيو ته پوليس پاران منشيات وڪڻندڙن خلاف سخت قانوني ڪارروائي عمل ۾ آندي ويندي ۽ هي سلسلو جاري رهندو. ريلي ۾ شرڪت ڪندڙن منشيات خلاف بينر ۽ پلي ڪارڊز کنيا ۽ ٻارن ۽ نوجوانن آگاهي پمفلٽ پڻ ورهايا. ڊپٽي ڪمشنر سرمد علي ڀاڳت ۽ ايس ايس پي ساجد امير سدوزئي چيو ته هي مهم نوجوانن ۾ شعور اجاگر ڪرڻ ۽ منشيات خلاف قومي جدوجهد کي مضبوط ڪرڻ ۾ هڪ اهم قدم آهي.