عمرڪوٽ: سٽي پوليس پاران 4 جوابدار گرفتار ڪري 4 ڪلو آفيس ھٿ ڪرڻ جي دعويٰ

عمرڪوٽ (رپورٽ:ڪانجي مل رکيسر) عمرڪوٽ سٽي پوليس ڳجهي اطلاع تي سامارو موڙ ۽ ڍورونارو روڊ تي ڌار ڌار ڪارروايون ڪندي تقريباً 4 ڪلو آفيم هٿ ڪري بين الاضلاعي منشيات فروش گروهه سان واسطو رکندڙ 4 جوابدارن کي گرفتار ڪري ورتو، جڏهن ته سندن خلاف منشيات ايڪٽ تحت ڪيس داخل ڪري وڌيڪَ جاچ شروع ڪئي وئي آهي، پوليس موجب پهرين ڪارروائي سامارو موڙ تي ڪئي وئي، جتي چيڪنگ دوران الٽو گاڏي نمبر BZ-409 کي روڪي تلاشي ورتي وئي، تلاشي دوران جوابدار علي اڪبر راڄڙ ۽ غلام مصطفيٰ راڄڙ کي گرفتار ڪري سندن قبضي مان ڏيڍ ڪلو آفيم هٿ ڪئي وئي، ٻئي ڪارروائي ڍورونارو روڊ تي ڪئي وئي، جتي ڪوري گاڏي نمبر AGR-354 کي روڪي تلاشي دوران جوابدار غلام رسول جٽ ۽ گهمن ڀيل کي گرفتار ڪري سندن قبضي مان اڍائي ڪلو آفيم هٿ ڪئي وئي، ايس ايڇ او سٽي نور محمد نوحاڻي موجب گرفتار ڪيل چارئي جوابدارن خلاف ڪيس داخل ڪيو ويو آهي، جڏهن ته شروعاتي جاچ دوران معلوم ٿيو آهي ته جوابدار سانگهڙ ۽ ميرپورخاص جا رهواسي آهن ۽ عمرڪوٽ سميت ٻين ضلعن ۾ آفيم جي فراهمي ۾ ملوث آهن، پوليس جو چوڻ آهي ته وڌيڪَ جاچ جاري آهي ۽ امڪاني سهولتڪارن ۽ نيٽ ورڪ بابت پڻ جاچ ڪئي پئي وڃي، هوڏانهن گرفتار جوابدارن کي عدالت ۾ پيش ڪيو ويو، جتان عدالت کين جوڊيشل ريمانڊ تي سب جيل اماڻي ڇڏيو.