تهران میں شہید علی لاریجانی کی نمازِ جنازہ ادا، ایران کا اسرائیل پر میزائل حملوں کا دعویٰ

تهران/تل ابیب/واشنگٹن/بیروت (ویب ڈیسک) پاسدارانِ انقلاب کے سکیورٹی چیف علی لاریجانی کی شہادت کے بعد ایران کی جانب سے اسرائیل کے دارالحکومت تل ابیب پر شدید حملوں کی اطلاعات سامنے آئی ہیں۔ تازہ دعوؤں کے مطابق اسرائیل میں 100 سے زائد اہداف کو نشانہ بنانے اور 200 افراد کے ہلاک و زخمی ہونے کا دعویٰ کیا گیا ہے۔

دوسری جانب اسرائیلی وزیرِ دفاع اسرائیل کاٹز نے دعویٰ کیا ہے کہ گذشتہ رات ایران کے انٹیلیجنس امور کے وزیر اسماعیل خطیب کو بھی نشانہ بنایا گیا ہے۔ ایران کی جانب سے اس دعوے کی تاحال نہ تصدیق کی گئی ہے اور نہ تردید۔
تہران میں جنازہ
ایران کے دارالحکومت تہران میں سپریم نیشنل سکیورٹی کونسل کے سیکریٹری شہید علی لاریجانی، بسیج کے کمانڈر میجر جنرل غلام رضا سلیمانی اور بحریہ کے درجنوں اہلکاروں کی نمازِ جنازہ ادا کی گئی۔ پاسدارانِ انقلاب کے میڈیا ادارے کے مطابق بڑی تعداد میں عوام نے شرکت کی۔
رپورٹ کے مطابق علی لاریجانی 17 مارچ کو اپنے بیٹے کے ساتھ تہران میں ایک مبینہ اسرائیلی حملے میں شہید ہوئے تھے، جبکہ بسیج کمانڈر کی شہادت بھی فضائی حملے میں ہوئی۔
لبنان پر اسرائیلی حملے
غیر ملکی میڈیا کے مطابق اسرائیل نے بیروت کے مختلف علاقوں پر شدید فضائی بمباری کی، جس کے نتیجے میں ایک 14 منزلہ عمارت منہدم ہوگئی۔ حملوں میں 12 افراد جاں بحق اور 41 زخمی ہوئے۔ رپورٹس کے مطابق لبنان میں اسرائیلی کارروائیوں کے نتیجے میں اب تک 800 سے زائد شہری ہلاک اور لاکھوں بے گھر ہو چکے ہیں۔
ایران کا مؤقف
ایرانی وزیرِ خارجہ عباس عراقچی نے کہا ہے کہ شہری آبادی کے قریب حملوں کی ذمہ داری امریکہ پر عائد ہوتی ہے۔ ان کے مطابق جہاں امریکی فوجی اڈے یا اہلکار موجود تھے، انہیں نشانہ بنایا گیا۔
دیگر پیش رفت
ایرانی حکام کے مطابق ائیر کوالٹی اور تابکاری کی صورتحال پر مسلسل نگرانی جاری ہے، اور اب تک خطرناک آلودگی کے آثار نہیں ملے۔
پاسدارانِ انقلاب نے دعویٰ کیا ہے کہ تل ابیب پر میزائل حملوں میں 100 سے زائد اہداف کو نشانہ بنایا گیا اور 200 افراد ہلاک یا زخمی ہوئے۔ اسرائیلی میڈیا کے مطابق ان حملوں میں 2 افراد ہلاک اور کچھ زخمی ہوئے۔
ایران اور بھارت کے درمیان آبنائے ہرمز میں جہازوں سے متعلق کشیدگی اور مطالبات کی خبریں بھی سامنے آئی ہیں۔
امریکی صدر ڈونلڈ ٹرمپ نے نیٹو پر تنقید کرتے ہوئے کہا کہ امریکہ کو کسی کی مدد کی ضرورت نہیں۔
ایرانی صدر مسعود پزشکیان نے کہا ہے کہ علی لاریجانی کی شہادت کا سخت جواب دیا جائے گا۔