لندن (ویب ڈیسک) برطانوی جریدے فنانشل ٹائمز نے بھی چیف آف ڈیفنس فورسز فیلڈ مارشل عاصم منیر کی متاثر کن شخصیت کا اعتراف کرتے ہوئے انہیں بدلتے ہوئے عالمی نظام میں ایک مؤثر اسٹریٹجک رہنما قرار دے دیا ہے۔
برطانوی جریدے فنانشل ٹائمز نے فیلڈ مارشل عاصم منیر کو کثیر جہتی خارجہ پالیسی کا ماہر قرار دیا ہے۔
فنانشل ٹائمز کے مطابق بدلتی ہوئی عالمی سیاست نے درمیانی طاقتوں کے لیے ایک نیا مگر مشکل دور شروع کر دیا ہے، جو ان ممالک کے لیے خاصا پیچیدہ ثابت ہو رہا ہے۔
رپورٹ میں بتایا گیا ہے کہ فیلڈ مارشل عاصم منیر درمیانی طاقتوں کے کامیاب ترین ملٹی الائنرز (multi-aligners) میں شامل ہیں، جبکہ ٹرمپ کے ساتھ سب سے بہتر ہم آہنگی قائم کرنے کا اعزاز پاکستان کے عسکری سربراہ فیلڈ مارشل عاصم منیر کو جاتا ہے۔
برطانوی جریدے نے فیلڈ مارشل عاصم منیر کو مڈل پاورز سفارتکاری کی کامیاب مثال قرار دیتے ہوئے لکھا ہے کہ پاکستان کی قیادت بیک وقت واشنگٹن، بیجنگ، ریاض اور تہران کے ساتھ روابط میں سرگرم رہی، اور فیلڈ مارشل عاصم منیر نے بدلتے ہوئے عالمی ماحول میں پاکستان کی سفارتکاری کو مؤثر انداز میں آگے بڑھایا۔
رپورٹ کے مطابق ٹرمپ کے ساتھ بروقت خوش گفتاری اور نرم سفارتی رویہ مؤثر ثابت ہوا، پاکستان کی سفارتی کامیابی نے بھارت کو مایوس کیا، بھارت کے لیے مڈل پاور کی سیاست توقع سے زیادہ مشکل ثابت ہوئی، کیونکہ بھارت بدلتے عالمی حالات اور ٹرمپ کے انداز کے ساتھ ہم آہنگ نہ ہو سکا، جس کے باعث اسے مڈل پاور حکمت عملی میں مشکلات کا سامنا ہے۔
0 تبصرے