گهگهر لڳ ڀنڀو ڳوٺ ۾ هٿياربندن جو گهر تي حملو، زال مڙس معصوم پٽ سميت قتل

وڏي وزير ۽ صوبائي گهرو وزير نوٽيس وٺي ڇڏيو

ملير (رپورٽ: عبدالرشيد مورجھريو) گهگهر ڦاٽڪ لڳ ڀنڀو ڳوٺ ۾ هڪ گهر اندر هٿياربند جوابدارن حملو ڪري ڪھاڙيون هڻي مڙس، زال ۽معصوم پٽ کي بي دردي سان قتل ڪري فرار ٿي ويا اسٽيل ٽائون ٿاڻي جي حد ۾ پيش آيل هِن افسوسناڪ واقعي ۾ مارجي ويلن جي سڃاڻپ مڙس عبدالمجيد وڌو، سندس گهر واري سڪينا وڌو ۽ سندن معصوم پٽ عبدالنبي وڌو طور ڪئي وئي آهي. پوليس واقعي واري هنڌ پهچي شاهديون گڏ ڪرڻ جو سلسلو شروع ڪري ڏنو آهي مارجي ويلن جو تعلق بلوچستان صوبي جي لسٻيلي سان ٻڌايو پيو وڃي. ٽن ڄڻن جي قتل واقعي جو سنڌ جي وڏي وزير ء سيد مراد علي شاھ ۽ گھرو وزير ضيا لنجار سخت نوٽيس وٺندي آء جي سنڌ کي قتل ۾ ملوث قاتلن کي جلد کان جلد گرفتار ڪري رپورٽ پيش ڪرڻ جو حڪم ڏنو آھي ٻئي پاسي پوليس جو چوڻ آهي ته واقعو ذاتي دشمني جو نتيجو ٿي سگهي ٿو، جڏهن ته جاچ هر رخ کان ڪئي پئي وڃي. لاش پوسٽ مارٽم لاءِ اسپتال منتقل ڪيا ويا آهن پوليس جو چوڻ آهي ته جوابدارن کي جلد گرفتار ڪيو ويندو.