سنڌ پوليس ۾ جعلي ڊوميسائل تي ڀرتي ٿيڻ جي ڪوشش ڪندڙ عورت سميت 7 اميدوار پڪڙي پيا

ڊي آءِ جي مقصود ميمڻ جي هدايتن تي ڊي ايس پي ايس ايس يو جعلسازي ڪندڙ 7 اميدوارن خلاف عزيز ڀٽي ٿاڻي تي ڪيس داخل ڪرايو

ڪراچي(اسٽاف رپورٽر) سنڌ پوليس ۾ جعلي ڊوميسائل ۽ پي آر سي تي ڀرتي ٿيڻ جي ڪوشش ڪندڙ عورت سميت 7 اميدوار پڪڙي پيا، ڪيس داخل، ڊي آءِ جي مقصود ميمڻ جي هدايتن تي ڊي ايس پي ايس ايس يو جعلسازي ڪندڙ 7 اميدوارن خلاف عزيز ڀٽي ٿاڻي تي ڪيس داخل ڪرايو. جنهن ۾ فراڊ جا قلم شامل ڪيا ويا. ايف آءِ آر جي متن موجب 2021 ۾ ايس ايس يو ۾ ڪانسٽيبلز جي ڀرتين لاءِ اشتهار ڏنو ويو هو، ڀرتين لاءِ سنڌ جو ڊوميسائل ۽ پي آر سي لازمي قرار ڏني وئي هئي، ٽيسٽ پاس ڪندڙن جا انٽرويو ڪيا ويا، اميدوارن ڪاغذ جمع ڪرايا، جيڪي تصديق لاءِ اماڻيا ويا، 7 اميدوارن جا ڊوميسائل لاڳاپيل آفيسن جعلي قرار ڏنا، جعلي ڪاغذن ذريعي نوڪري حاصل ڪرڻ ڏوهه آهي، جعلسازي ڪندڙن ۾ وقاص، اختر علي، اڪبر، نعيم، نبيل، عشرت ۽ شهزاد شامل آهن، متن موجب وقاص ولد شوڪت علي 28 مارچ 2016 تي اولهه ضلعي مان ڊوميسائل پي آر سي ٺهرايا، اختر علي زيب ولد شير زيب7 ڊسمبر 2017 تي اولهه ضلعي ۾ ڊوميسائل ۽ پي آر سي ٺهرايا، اڪبر علي ولد نثار حسين 2008 ۾ اوڀر ضلعي مان ڊوميسائل پي آر سي ٺهرايا، نعيم ولد قربان علي 2015 ۾ اوڀر ضلعي جو ڊومسائيل ۽ پي آر سي ٺهرائي، محمد نبيل ولد شيراز 2017 ۾ ڏکڻ ضلعي جو ڊوميسائل ۽ پي آر سي ٺهرايو، عشرت ڌيءَ محمد اسلم 2016 ۾ ملير ضلعي جو ڊوميسائل ۽ پي آر سي ٺهرايو ۽ شهزاد ولد رحمت الله 2015 ۾ ملير ضلعي جو ڊوميسائل ۽ پي آر سي ٺهرايو. جوابدارن خلاف قانوني ڪارروائي ڪئي وڃي