"سو رہے تھے، اچانک ایک زلزلہ محسوس ہوا"، پاکستانی شہریوں کا بھارتی حملے کا چشم دید بیان

بھارتی فوج نے رات کے وقت بزدلانہ حملہ کرتے ہوئے آزاد کشمیر کے علاقے کوٹلی، مظفر آباد اور باغ کے علاوہ مریدکے اور احمد پور شرقیہ میں شہری آبادی کو نشانہ بنایا۔ مریدکے کے نواحی علاقے ننگل ساہداں کے رہائشیوں نے بتایا کہ بھارت نے مقامی مسجد اور اس کے اطراف میں یکے بعد دیگرے چار حملے کیے۔ مقامی افراد کے مطابق جن مساجد اور مدرسے کو نشانہ بنایا گیا، وہ ان کے قریب ہی واقع ہیں۔ علاقے کے لوگوں نے کہا کہ پہلے ایک دھماکہ سنا گیا، اس کے بعد تین مزید دھماکے ہوئے۔ عثمان نامی ایک مقامی شہری نے جیو نیوز کو بتایا کہ علاقے کے لوگ حوصلے بلند رکھتے ہوئے پاک فوج کے ساتھ کھڑے ہیں اور بھارتی جارحیت کا جواب اسی کی زبان میں دیا جائے گا۔ انہوں نے کہا کہ بھارت نے اس حملے میں سویلین آبادی کو نشانہ بنایا ہے۔ مظفرآباد کے علاقے شوائی سے نقل مکانی کرنے والے ایک خاندان نے بتایا کہ وہ سو رہے تھے کہ اچانک ایک زلزلہ جیسا محسوس ہوا اور خوف کے مارے وہ اپنے گھروں سے باہر نکل آئے۔ واضح رہے کہ بھارتی فوج کے بزدلانہ حملے میں دو مساجد شہید ہو گئیں، جبکہ ایک بچی سمیت 13 پاکستانی شہید اور 36 زخمی ہوئے۔ پاکستانی فوج نے بھارتی کارروائیوں کا بھرپور جواب دیتے ہوئے بھارتی فوج کے 3 رافیل، ایک سکوئی، ایک مگ 29 اور ایک ڈرون تباہ کر دیا، اور بھارتی فوج کا بریگیڈ ہیڈکوارٹر بھی تباہ کیا۔