شڪارپور ويجهو لولائي برادري جي ٻن ڌرين ۾ هلندڙ تڪرار تان ماءُ ڌيءَ سميت 3 گهرڀاتي قتل

هٿياربندن جي فائرنگ ۾ فهميده زال معشوق لولائي، سندس معصوم ڌيءَ عليشه ۽ ڏير رفيق لولائي مارجي ويا، لاش اسپتال منتقل

شڪارپور (احسان ابڙو) بڊو ٿاڻي جي حد سومراڻي وڌيو ۾ حسن عرف حسنو لولائي ڌر ۽ عثمان لولائي ڌر جي وچ ۾ هلندڙ پراڻي خوني تڪرار تان هٿياربندن موٽرسائيڪل سوارن تي فائرنگ ڪري ڏني، جنهن جي نتيجي ۾ فهميده زال معشوق، سندس معصوم ڌيءَ عليشه ۽ ڏير رفيق ولد الله وڌايو لولائي قتل ٿي ويا. اطلاع ملندي ئي ايس ايس پي شڪارپور شاهزيب چاچڙ پاران قتل ۾ ملوث جوابدارن کي گرفتار ڪرڻ جا حڪم جاري ڪري ڇڏيا. حسن عرف حسنو لولائي ڌر ۽ عثمان لولائي ڌر ۾ قتل جو واقعو هلندڙ پراڻي خوني تڪرار تان پيش آيو. بڊو پوليس لاشن کي تحويل ۾ وٺي ضروري ڪارروائي لاءِ اسپتال منتقل ڪري ڇڏيا. ايس ايس پي شڪارپور جو چوڻ هو ته پوليس جي وڏي نفري علائقي ڏانهن واقعي واري هنڌ موڪلي وئي آهي. ملوث جوابدارن جي گرفتاري لاءِ خاص ٽيمون جوڙيون ويون آهن. پوليس پاران مختلف هنڌن تي ناڪابندي، سرچ آپريشن ۽ ڇاپا هنيا پيا وڃن. واقعي جي وڌيڪ جاچ ۽ قانوني ڪارروائي ڪئي پئي وڃي. قتل ۾ ملوث جوابدارن کي جلد کان جلد گرفتار ڪيو ويندو.