سجاول ۾ گئس جي لوڊشيڊنگ ۽ پريشر گهٽجڻ خلاف احتجاج، گئس آفيس آڏو ڌرڻو

سجاول (رپورٽ گلشيرميربحر) سجاول ۾ شهرين پاران گئس جي ھٿرادي کوٽ خلاف احتجاجي مظاهرو ڪيو ويو، پ ٽ الف سجاول جي استادن شاگردن ۽ شهرين گيس آفيس آڏو احتجاجي مظاهرو ڪري گيس انتظاميه خلاف سخت نعري بازي ڪئي وئي . ان موقعي تي مظاهري کي خطاب ڪندي پ ٽ الف جي استادن محمدعمرميمڻ، نجيب سرويچ، لطف الله ميمڻ، عبدالشڪورميربحر، خالد سمون، احمدملاح، جي يو آئي اڳواڻ اشرف ميمڻ، مجلس وحدت المسلمين سجاول جو اڳواڻ حاجي مظفرعلي لغاري، واپاري نياز ميمڻ. ڊاڪٽرهوت چند ۽ ٻين چيو ته سجاول ضلعو قدرتي وسيلن سان مالامال آهي پر افسوس گيس انتظاميه گذريل هڪ مهيني کان گيس جي هٿرادي کوٽ پيدا ڪري هتي جي مقامي ماڻھن کي گيس فراهمي کان محروم ڪيو ويو آهي . صبح جو 8 بجي ٻارن جي اسڪول وڃڻ جي ٽائيم تي گيس بند ڪيو وڃي ٿو جنهن سبب شاگرد بغيرناشتي جي اسڪول وڃن ٿا، هنن چيو ته اهڙي شڪايت اسان گيس انتظاميه کي ڏني آهي پر ان باوجود اڃاتائين ڪوبه عمل نه ٿي سگهيو آهي. هنن چتاءُ ڏنو ته گيس جي بندش ختم نه ڪئي وئي ته پ ٽ الف سجاول پاران برانچ موري تي قومي شاهراه بند ڪري احتجاجي ڌرڻو هنيو ويندو، ڌرڻي جي هڪ ڪلاڪ بعد اڳوڻي ڊپٽي اسپيڪر سنڌ پ پ پ ايم پي اي ريحانه لغاري مظاهرين وٽ پهچي گيس انتظاميه کي گهرائي مسئلي کي حل ڪرڻ لاءِ چيو جنهن تي گيس انتظاميه شهرين کي ٻن ڏينهن ۾ گيس جي فراهمي مهيا ڪري ڏيڻ جو واعدو ڪيو. جنهن بعد مظاهرين ڌرڻو ختم ڪيو. ٻي پاسي جي يو آئي سجاول پاران گيس جي اڻ علانيه لوڊشيڊنگ خلاف جي يو آئي اڳواڻ اشرف ميمڻ جي اڳواڻي ۾ جامع مسجد کان پبلڪ پارڪ تائين ريلي ڪڍي احتجاجي مظاهرو ڪيو ويو مظاهري ۾ جي يو آئي ڪارڪنن ۽ شهرين وڏي انگ ۾ شرڪت ڪئي. مظاهري کي خطاب ڪندي اڳواڻن چيو ته سجاول شهر ۾ گيس جو هٿرادو بحران پيدا ڪري شهرين سان وڏو ظلم ڪيو پيو وڃي گيس نه ھجڻ ڪري شهري هوٽلن تان کاڌو وٺي اچڻ تي مجبورٿي ويا آھن. هنن ضلع انتظاميه کي مطالبو ڪندي چيو ته سجاول شهر ۾ گيس جي فراهمي کي يقني بنائي شهرين جي پريشانين کي ختم ڪيو وڃي.