ميرپورساڪرو ڀرسان ڀائرن ۽ ڀائٽي هٿان قتل ٿيل نوجوان جي گهگهر ۾ جنازي نماز ادا

ھڪ ايڪڙ زرعي زمين جي تڪرار تان ڀائرن ۽ ڀائٽي ھٿان قتل ٿيل نبي بخش ڪلمتي جي جنازي نماز ادا ڪئي وئي

ملير (رپورٽ: عبدالرشيد مورجھريو) زمين جي تڪرار تان ڀائرن ۽ ڀائٽي هٿان مارجي ويل نوجوان جي گهگهر ۾ جنازي نماز ادا ڪئي وئي، ھڪ ڏينھن اڳ گھگھر واسي ٽن جوابدارن ھلان ڪري سڳي ڀاءُ کي قتل ڪري ڇڏيو هو، ڀائرن ۾ ڪيترن ئي ڏينهن کان ھڪ ايڪڙ زرعي زمين جو تڪرار ھلندڙ ھو، تفصيل موجب ميرپور ساڪرو ٿاڻي جي حد ۾ ڀائرن ۽ ڀائٽي ھٿان بيدرديءَ سان قتل ٿيل نبي بخش ڪلمتي جي جنازي نماز ادا ڪئي جنهن ۾ سوين شھرين شرڪت ڪئي،ان سلسلي ۾ چيو وڃي ٿو ته گذريل ڇنڇر واري ڏينهن زميني تڪرار تان گھگھر واسي رمضان ولد تاج محمد پنھجي والد ۽ يوسف سان گڏجي ليٽ اسٽاپ ويجهو ڏرڙ موري تي رھندڙ نبي بخش عرف نبو ڪلمتي کي گھران ٻاهر سڏي حملو ڪري ڏنو حملي ۾ لٺين ڪھاڙين ۽ سرين جا وار ڪري کيس شديد زخمي ڪري فرار ٿي ويا اکين ڏٺن شاهدن موجب حملو ڪندڙن ڳوٺ وارن کي ذاتي مسئلي جو چئي زخمي کي کڻڻ جي صورت ۾ سخت نتيجا ڀوڳڻ جون ڌمڪيون ڏيندا رھيا جنهن سبب پوري علائقي ۾ خوف واري صورتحال پيدا ٿي وئي ، زخمي شخص کي ڪيترن ئي ڪلاڪن کان پوءِ پوليس پھچي جناح اسپتال منتقل ڪيو جتي زخمن جا سور نه سهندي هو فوت ٿي ويو، جنهن جي جنازي نماز حمر ڳوٺ گھگھر ۾ ادا ڪرڻ بعد سوين آلين اکين سان مٽيءَ ماءُ حوالي ڪيو ويو، ٻئي پاسي واقعي جو اطلاع ملڻ بعد مير پور ساڪرو پوليس ٻن جوابدارن، رمضان ولد تاج محمد ۽ يوسف ولد شفيع محمد کي گرفتار ڪري ڪيس داخل ڪري ڇڏيو آهي.