ٺٽي جي ڪرسچن ڪالوني ڀرسان ڪچي آبادي ۾ گهرن کي باهه وڪوڙي ورتو

باهه سبب مختيار منڇري، تيرٿ ڪاريو، تارا، جگديش سميت 10 پورهيتن جا گهر سڙي ويا

ٺٽو(ڊ ر) ٺٽي شھر جي ڪرسچن ڪالوني ۽ سنڌ ھال جي پٺيان ڪچي آبادي ۾ اوچتو باھ لڳڻ جي نتيجي ۾ 10 پورھيتن جا گھر سامان سوڌو سڙي رک ٿي ويا، ڪير بہ مدد لاء نہ پھتو، شھري پنھنجي مدد پاڻ تحت باھ وسائڻ ۾ مصروف، باھ متاٿرين کليل آسمان ھيٺ بي يارو مدد گار بڻيل ڪير بہ پوئيواري ڪرڻ وارو ناھي ۽ نہ ئي شھر جي ڪچي ابادي ھوندي ڪا فائر برگيڊ گاڏي پھچي سگھي، باھ اک ڇنڀ ۾ 10 گھر ساڙي رک ڪري ڇڏيا، باھ متاثرين پاران واھر جي اپيل ڪئي ويئي اھي، تفصيل موجب ٺٽي شھر جي ڪرسچن ڪالوني توڙي سنڌ ھال جي پٺيان ڪچي آبادي ۾ اوچتو باھ لڳڻ جي نتيجي ۾ مختيار منڇري، تيرٿ ڪاريو، تارا، جگديش، مولو، پرشوتم، لالو، ڪشور، اتمو ڪاريو سميت 10 پورھيتن جا گھر سامان سوڌو سڙي رک ٿي ويا، گھر ڀاتين ڀڄي رڳو جان بچائي ورتي آھي، باھ لڳڻ باوجود ٺٽي شھر جي ڪچي آبادي ۾ فائر برگيڊ گاڏي بہ پھچي ناھي سگھي، باھ متاثرين ھن وقت کليل آسمان ھيٺ بي يارو مددگار بڻيل آھن، جن جي اڃان تائين ڪنھن بہ سار ناھي لڌي، باھ متاثرين موجب باھ بجلي جي شارٽ سرڪٽ مان لڳي آھي، ھنن چيو تہ مختيار منڇري سميت سندن 10 گھر سموري سامان سوڌو سڙي رک ٿي ويا آھن، پر افسوس جو کين باھ وسائڻ لاء فائر برگيڊ گاڏي بہ ملي ناھي سگھي، پنھنجي مدد پاڻ تحت باھ وسائي آھي، ھنن چيو تہ سندن سڀ ڪجھ ختم ٿي ويو، ھاڻي ٻيھر گھر ٺاھڻ جي بہ پھچ ناھي رھي، ھنن چيو تہ ھن وقت ٻچن سان گڏ کليل آسمان ھيٺ بي يارو مدد گار بڻيل اھيون، پر سندن ڪير بہ سار لھڻ وارو ناھي، ھنن وس وارن کان گھر ڪئي تہ سندن پوئيواري ڪري ٿيل نقصان جو ازالو ڪرائي کين ٻيھر اجھا اڏائي ڏنا وڃن، جيئن ٻڇن کي سردي توڙي گرمي پان بچائي سگھون.