نصيرآباد ۾ مبينا کنڀيل نويد ساگر ڪانڌڙو ۽ واجد چانڊيو جي آزادي لاءِ ريلي

سسئي لوھار، فقير علي گل ڪانڌڙو ۽ ٻين جي اڳواڻي ۾ ريلي ڪڍي وئي

نصيرآباد (رپورٽر) نصيرآباد مان مبينا کنڀيل سنڌ يونائيٽيڊ پارٽي ڪارڪن نويد ساگر ڪانڌڙو ۽ ڪيبل آپريٽر واجد چانڊيو جي آزادي لاء نوناري محلا کان پوليس اسٽيشن تائين احتجاجي ريلي ڪڍي وئي.

ريلي جي اڳواڻي وائس آف مسنگ پرسن جي اڳواڻ سسئي لوھار، سنڌ يونائيٽيڊ پارٽي جي ضلعي ڊپٽي آرگنائيزر فقير علي گل ڪانڌڙو ،عوامي ورڪرز پارٽي جي ڪامريڊ رياض ڦلپوٽو ۽ ڪميونسٽ پارٽي جي ڪامريڊ جميل شيخ جي اڳواڻي ۾ ريلي نوناري محلي کان پوليس اسٽيشن تائين ڪڍي وئي.

ريلي شھر جي مختلف رستن ۽ چونڪن کان ٿيندي نوجوانن جي آزادي لاء نعريبازي ڪندي ايس يو پي جا ڳاڙها جھنڊا کڻي اھو مطالبو ڪري رهيا ھئا ته سنڌ يونائيٽيڊ پارٽي جي ڪارڪن نويد ساگر ڪانڌڙو ۽ ڪيبل آپريٽر واجد چانڊيو کي آزاد ڪرايو وڃي، مظاهرين مطالبو ڪندي چيو ته پاور پوليٽڪس جي سياست ڪندڙ ڊاڪٽر نويد ساگر ڪانڌڙو ۽ واجد چانڊيو کي بنا دير آزاد ڪندي ڪورٽن ۾ پيش ڪيو وڃي ٻي صورت ۾ اسان جو احتجاج جاري رهندو.

احتجاجي مظاهري ۾ سنڌ يونائيٽيڊ پارٽي ،وي ايم پي سنڌ ،عوامي ورڪرز پارٽي ،ڪميونسٽ پارٽي ،سنڌ ترقي پسند پارٽي،نمسوا ،گسٽا سان گڏوگڏ ٻين تنظيمن جي ڪارڪنن ۽ شهرين پڻ شرڪت ڪئي.