ايم ڊي ڪيٽ پيپرن جو سودو ڪيو ويو، ايس پي ايس سي جون نوڪريون وڪڻيون ويون: اياز لطيف پليجو

ميرٽ ذريعي سنڌ کي بدلائي ۽ ڪرپٽ ماڻھن کي شڪست ڏئي سگھجي ٿي

حيدرآباد(بيورو) قومي عوامي تحريڪ جي سربراھ اياز لطيف پليجي چيو تہ اوھان ايم ڊي ڪيٽ جي پيپرن جو سودو ڪري، نوڪرين ۾ ڀرتيءَ جي عمر گھٽائي ۽ سنڌ پبلڪ سروس ڪميشن جون نوڪريون وڪڻي، ڪروڙين نوجوانن ۽ شاگردن جي مستقبل جو، انھن جي آسن، اميدن، محنتن، جذبن ۽ خوابن جو خون ڪيو آھي. ان سنگين جرم جا ذميدار اوھين سڀ حڪمران، موجوده ۽ ايندڙ نسلن جا ۽ انھن جي گھرڀاتين جا قاتل آھيو.اياز لطيف پليجي چيو تہ ميرٽ ذريعي سنڌ کي بدلائي ۽ ڪرپٽ ماڻھن کي شڪست ڏئي سگھجي ٿي. زراعت کان وٺي ھر شعبي ۾ ٽيڪنالاجي جائي والاري آھي. ٻين ملڪن ۾ ماڻھن جي جڳھ تي ربوٽ جائي والاري آھي. سنڌ ماڻھو گھران نڪرن ٿا تہ شام تائين سلامتي سان واپسي جو خطرو ۽ خوف رھي ٿو. ھٿ وٺي سنڌ کي قيد خانو بنايو ويو آھي. سنڌ جا ماڻھو قيديءَ واري زندگي گذارڻ تي مجبور آھن. پيپلز پارٽي چاھي ٿي تہ سنڌ جا ماڻھو بيدار نہ ھجن. باشعور نہ ٿين. آھي جاھل وڏيرڪي، سرداري، جاگيرداري ۽ عوام دشمن سرمائيداري نظام جي غلامي ۾ قيد ھجن. ڪنڌ کڻي ھلي نہ سگھن.اياز لطيف پليجي چيو تہ سنڌو درياھ تي پنجاب ۾ 6 نوان ڪئنال ٺاھڻ وارو منصوبو سنڌ دشمن آھي.ارسا ايڪٽ ۾ ترميم ڪري سنڌ جي حصي جي پاڻي تي ڌاڙو هڻي سنڌ کي رڻ پٽ ۽ بيابان ۾ تبديل ڪرڻ ۽ سنڌ جي عوام کي پاڻي لاءِ تڙپائي مارڻ جي خطرناڪ سازش ڪئي پئي وڃي. سنڌ کي پنهنجي حصي جو پاڻي ڏنو وڃي سنڌو درياءُ مان زبردستي ڪئنال ڪڍڻ ۽ ڊيم ٺاهي سنڌو درياءُ کي قيد ڪرڻ جا سنڌ دشمن منصوبا رد ڪيا وڃن.