پورھيت تنظيمن جي مرڪزي ۽ صوبائي قيادت ڏھرڪي پھچي وئي، ھنگامي گڏجاڻي منعقد

پورھيت تنظيمن جي مرڪزي ۽ صوبائي قيادت ڏھرڪي پھچي وئي، ھنگامي گڏجاڻي منعقد

ڏھرڪي(عمران علي ملڪ) گھوٽڪي ضلعي جي مختلف صنعتي ادارن ۽ ادارن ۾ ڪم ڪندڙ پورھيتن جا مسـئلا حل ڪرائڻ لاءِ پورھيت تنظيمن جي مرڪزي ۽ صوبائي قيادت ڪالھ ڏھرڪي پھتي جتي اينگرو، ماڙي پيٽروليم، لبرٽي پاور پلانٽ ڦچ، ايف ايف سي ۽ ڏھرڪي ٽائون ڪاميٽي ۽ ٻي ادارن جي مزدور تنظيمن جي اڳواڻن جو ڪٺ ٿي گذريو. ڪٺ کي خطاب ڪندي پاڪستان ورڪرز فيڊريشن جي مرڪزي جنرل سيڪريٽري وقاراحمد ميمڻ، سنڌ ريجن جي صوبائي چيئرمين محمد اشفاق، عبدالرحمان صديقي، امام دين، رحمت علي، لکمير مھر ۽ ٻين خطاب ڪندي چيو تہ ضلعي گھوٽڪي جي سڀني ادارن جي پورھيتن جا مسئلا ڳنڀير آھن جن کي فوري طور حاصل ڪرڻو آھي. ساڳي وقت پورھيتن جي خاندان کي صحت ۽ سندن اولاد کي تعليم جي سھولت پڻ ڏيارڻ لاءِ جاکوڙ ڪرڻ گھرجي. ھنن چيو تہ لبرٽي پاور پلانٽ جي انتظاميہ مقامي ماڻھن سان دشمني واري رويو رکندي پئي اچي. درجنين پورھيتن جون نوڪريون چٽ ڪري آفيسر آرامي ٿيو ويٺا آھن. برطرف پورھيتن جي گھر جي چلھ وسائڻ بعد کين سک جو ساھ نہ کڻڻ ڏنو ويندو. ھنن چيو جلدي گھوٽڪي ضلعي اندر ملڪ گير ورڪرز ڪنوينشن ڪوٺايو ويندو. جنھن ۾ ھتان جي مڙني ادارن کي پورھيتن جا مسئلا حل ڪرڻ لاءِ ھڪ محدود وقت لاءِ مھلت ڏني ويندي. جنھن دوران مسئلا حل نہ ٿيا تہ دما دم مست قلندر ڪيو ويندو. ھنن وڌيڪ چيو تہ مزدور جي پگھر وھي ٿو تہ افسر شاھي سڻڀو گرھ کائين ٿا ھاڻي پورھيتن جي تقدير بدلائڻ مزدور تنظيمن کي ھڪ پليٽ فارم تي گڏ ٿي سخت ۽ پرامن جدوجھد ڪرڻي پوندي. ڪٺ کي مزدور اڳواڻن فتح محمد لکن، رانجھڻ سميجو،رجب علي سميجو، غلام سرور، غلا مرتضيٰ، لعل بخش، موج علي، منير سومرو، شوڪت دائودپوٽو ۽ ٻين پڻ خطاب ڪيو.