سانگهڙ ۾ قدرتي آفتن جي عالمي ڏهاڙي تي آگاھي سيمينار منعقد

سيمينار ۾ سرڪاري کاتن جي عملدارن، اين جي اوز ۽ سول سوسائٽي جي نمائندن شرڪت ڪئي

سانگهڙ(رپورٽر) قدرتي آفتن جو عالمي ڏهاڙو سانگهڙ ۾ غير سرڪاري تنظيم اين ڊي ايف طرفان پاٿفائينڊر انٽرنيشنل جي in سهڪار سان هڪ مقامي هوٽل ۾ ملهايو ويو جنهن ۾ سرڪاري کاتن جي عملدارن، اين جي اوز ۽ سول سوسائٽي جي نمائندن شرڪت ڪئي ۽ ماحولياتي تبديلين سبب ايندڙ قدرتي آفتن جا نقصان گهٽائڻ لاءِ جامع پاليسي ترتيب ڏيڻ ۽ عوام ۾ ماحولياتي گدلاڻ بابت آگاهي ڏيڻ تي زور ڀريندي مطالبو ڪيو آهي ته ملڪ ۾ ختم ٿيندڙ ٻيلن کي بحال ڪرڻ سميت وڻڪاري تي وڌ کان وڌ ڌيان ڏنو وڃي. قدرتي آفتن جي عالمي ڏهاڙي جي تقريب کي خطاب ڪندي نامور ليکڪ ۽ پروفيسر نواز ڪنڀر، ڊسٽرڪٽ ڊزاسٽر مينيجمينٽ سانگهڙ جي فوڪل پرسن صابر حسين مهر، نويد خيال، نور منگي، عظيم رونجهو، طارق حسين چنڙ، سڪندر علي، ڊاڪٽر امجد۽ ساجدہ چيو ته گڏيل قومن طرفان 1989 ۾ قدرتي آفتن جو عالمي ڏهاڙو هر سال 13 آڪٽوبر تي ملهائڻ جو اعلان ڪيو ويو ته جئين عوام ۾ قدرتي آفتن ۽ ماحولياتي تبديلين بابت آگاهي ڏئي سگهجي جڏهن ته ماحولياتي گدلاڻ سبب متاثر ٿيندڙ ملڪن ۾ پاڪستان 5 نمبر تي آهي. هنن چيو ته سنڌ ۾ 2010، 2011 ۽ 2022 جي ٻوڏ وڏي تباهي آندي جنهن سبب سڄي صوبي جي عوام کي لڏپلاڻ ڪرڻي پئي هنن چيو ته بهتر انتظام نه هجڻ سبب قدرتي آفتن وڏي تباهي آندي. ادارن جي گنجائش وڌائڻ، ماحولياتي تبديلين بابت پاليسي نئي سر ترتيب ڏيڻ، پاڻي جي قدرتي وهڪرن جي بحالي سميت فنڊنگ جي مناسب استعمال سان اسان قدرتي آفتن جي نقصانن کي گهٽائي سگهون ٿا. هنن چيو ته قدرتي آفتن سبب عورتون، ٻار، معذور ۽ پيرسن ماڻهو وڌيڪ متاثر ٿين ٿا جن جي وقتائتي سهائتا ڪرڻ لازمي آهي. هنن چيو ته سانگهڙ شهر سم نالن سبب هر ٻوڏ ۾ متاثر ٿئي ٿو تنهن ڪري سم نالن جي صفائي ۽ مرمت انتهائي لازمي آهي.