وڳڻ ويجھو 22 ڏينھن اڳ جھيڙي دوران مارجي ويل ٻن ڄڻن جي وارثن وٽ ميڙ منٿ قافلو پھتو

ڳوٺ ياروديرو ۾ پلاٽ جي مالڪي تان پنھور ڌرين ۾ جھيڙي دوران شاگرد زُبير پنھور ۽ اسد الله پنھور مارجي ويا ھئا

وڳڻ(رپورٽر) وڳڻ لڳ ڳوٺ ياروديرو ۾ 22 ڏينھَن اڳ پلاٽ جي مالڪي جي معاملي تان پنھور برادري جي ٻن ڌرين ۾ ٿيل جھيڙي دوران قتل ٿي ويل ڪامرس ڪاليج جي شاگرد زُبير احمد پنھور ۽ پورھيت اسد الله پنھور جي وارثن رئيس ديدار علي پنھور ۽ بدرالدين پنھور وٽ علائقي جي معزز سيد رياض حسين شاھُ، سيٺ نواب علي تنيو، مفتي عبدالحليم ڇٽو، حاجي زاھد علي تنيو، اعجاز علي وڳڻ، بھادر خان چانڊيو، سيد عمران علي شاھ، اياز علي ڀٽو، ڪامران تنيو، ضمير حسين تنيو، حبدار علي بروھي ، ظفر مغيري ۽ ٻين پاران قرآن پاڪ کڻي ڌرين ۾ صلح ڪرائڻ ۽ امن امان جي فضا قائم ڪرائڻ لاء ميڙ منٿ قافلو وٺي وٽن پھتا جتي ميڙ منٿ قافلي ۾ موجود سيد رياض علي شاھ مفتي عبدالحليم ڇٽو ۽ سيٺ نواب علي تنيو مقتول نوجوان زُبير جي پيءُ کي معاملي ڳالھين ذريعي حل ڪرائڻ لاء منٿ ڪئي جنھنجي جواب ۾ مقتول نوجوان جي پيءُ ديدار علي پنھور ميڙ منٿ قافلي کي مان ڏيندي کين چيو ته توھان اڄ توھان امن جو پيغام کڻي اسان وٽ پھتا آھيو سنڌ مان خوني ۽ قبائلي جھيڙا ختم ڪرائڻ لاء شھيد بشير خان قريشي ميڙ منٿ قافلا وٺي ويندو ھُيو اُنڪري آيل قافلي جي آجيان ڪريون ٿا پر اسانجو ھڪ شرط آھي ته اسانجي ٻنھي نوجوانن جي قتل ۾ ملوث جوابدار پوليس وٽ پيش ٿين ته پوء اسان پنھنجي برادري جي سردار چنگيز خان پنھور وٽ ٺاھ ڪنداسين سندس اھڙي خاطري بعد ميڙ منٿ قافلي جي اڳواڻن ڌرين ۾ صلح ڪرائڻ لاء پنھور برادري جي سردار سان ملڻ جو فيصلو ڪيو جڏھن ته بعد ۾ دعاء خير پڻ گُھري وئي.