بچی فاطمہ کے ساتھ جنسی زیادتی اور تشدد کی تصدیق

پولیس سرجن امان اللہ بھنگوار نے بچی فاطمہ کے ساتھ جنسی زیادتی اور تشدد کی تصدیق کی

رانی پور ( رپورٹر) رانی پور میں پیروں کی حویلی میں بچی فاطمہ پر تشدد، جنسی زیادتی کی تصدیق ہوگئی۔ میڈیا رپورٹس کے مطابق میڈیکل بورڈ میں شامل پولیس سرجن امان اللہ بھنگوار نے بچی فاطمہ کے ساتھ جنسی زیادتی اور تشدد کی تصدیق کی ہے۔ پولیس سرجن امان اللہ بھنگوار کا کہنا ہے کہ بچی فاطمہ کے ساتھ بدسلوکی اور تشدد کے شواہد ملے ہیں۔ ڈی آئی جی سکھر جاوید جسکانی کا کہنا ہے کہ میڈیکل بورڈ نے لڑکی پر تشدد اور زیادتی کی تصدیق کردی ہے۔ انہوں نے کہا کہ پوسٹ مارٹم کے بغیر لاش کو دفنانے اور حقائق چھپانے کے مقدمے میں ایس ایچ او رانیپو، بڑے منشی، ڈاکٹر اور کمپاؤنڈر کو نامزد کر کے ان کا ریمانڈ دینے کا فیصلہ کیا ہے۔ ڈی آئی جی سکھر کا مزید کہنا تھا کہ حویلی میں کام کرنے والے تمام بچوں کو بازیاب کر کے ان کے گھروں کو منتقل کیا جائے گا۔ جاوید جسکانی کے مطابق حویلی میں موجود تمام مردوں کے ڈی این اے ٹیسٹ کے لیے نمونے لیے جائیں گے۔ دریں اثناء پولیس نے بچی کے قتل کیس کے مرکزی ملزم اسد اللہ شاہ کو گمس منتقل کر دیا جہاں ماہر ڈاکٹروں نے ملزم کے ڈی این اے ٹیسٹ کے لیے نمونے لے لیے ہیں۔