عوامي تحريڪ پاران سنڌ ٽوڙڻ جي سازشن خلاف 8 آگسٽ تي ملير ۾ ريلي ڪڍڻ جو اعلان

9 views | 02nd Aug 2026 • سنڌي خبرون

عوامي تحريڪ جو اجلاس ضلعي صدر پرهه سومرو جي صدارت هيٺ گهگهر ڦاٽڪ ۾ ٿيو

عوامي تحريڪ پاران سنڌ ٽوڙڻ جي سازشن خلاف 8 آگسٽ تي ملير ۾ ريلي ڪڍڻ جو اعلان

ملير (رپورٽ: عبدالرشيد مورجھريو)عوامي تحريڪ ملير ضلعي جو اجلاس ضلعي صدر پرهه سومرو جي صدارت هيٺ گهگهر ڦاٽڪ ۾ منعقد ٿيو جنهن ۾ عوامي تحريڪ جي مرڪزي جنرل سيڪريٽري ايڊووڪيٽ ساجد حسين مهيسر خاص شرڪت ڪئي اجلاس ۾ ضلعي ۽ تعلقن جي تنظيمي صورتحال جو جائزو وٺندي ايندڙ تنظيمي دورن ۽ سرگرمين بابت رٿابندي ڪئي وئي اجلاس کي خطاب ڪندي اڳواڻن چيو ته نون صوبن جي تجويزن ۽ سنڌ کي ورهائڻ بابت ٿيندڙ بحثن کي سنڌ جي وحدت خلاف سازش سمجهيو وڃي ٿو، جنهن جي عوامي تحريڪ سخت مخالفت ڪندي. هنن چيو ته سنڌ جي تاريخي، جاگرافيائي ۽ قومي سڃاڻپ جي تحفظ لاءِ جمهوري ۽ آئيني جدوجهد جاري رکي ويندي اڳواڻن زور ڏنو ته ملڪ جي استحڪام جو دارومدار آئين، صوبن جي آئيني حقن، خودمختياري ۽ قومي وحدتن جي احترام ۾ آهي، جڏهن ته سمورن ادارن کي آئيني دائري اندر رهي پنهنجون ذميواريون نڀائڻ گهرجن. اجلاس ۾ متفقه طور فيصلو ڪيو ويو ته 8 آگسٽ تي سنڌ جي وحدت جي حق ۾ ۽ نون صوبن بابت تجويزن جي مخالفت ۾ گهگهر جي محمدي مسجد کان مين روڊ، ملير تائين احتجاجي ريلي ڪڍي ويندي، جنهن جي اڳواڻي عوامي تحريڪ جي مرڪزي صدر ايڊووڪيٽ وسند ٿري سميت پارٽي جي مرڪزي، ضلعي ۽ سنڌياڻي تحريڪ جي قيادت ڪندي اجلاس ۾ ايڊووڪيٽ عبدالله ٻپڙ، عزيز لانگاهه، جبار پليجو، علي محمد ڪلمتي، ذوهيب ڪلمتي، ماجد جروار، ڊاڪٽر رحمت الله، عباس ملاڻو، نظير ميمڻ ۽ ٻين اڳواڻن پڻ شرڪت ڪئي.