فلم اسٽار مصطفيٰ قريشي جي گھرواري ۽ ناليواري گلوڪارا روبينا قريشي جي چوٿين ورسي

روبينه قريشي اڄ به منهنجين يادين ۾ زنده آهي، مان کيس ڪڏهن به وساري نه سگهيو آهيان: مصطفيٰ قريشي

ڪراچي(شوبز نيوز) پاڪستان جي نامياري فلم اسٽار مصطفيٰ قريشي جي گهرواري ۽ واديءِ سنڌ جي مشهور گلوڪاره بلبل مهراڻ روبينه قريشي جي چوٿين ورسي گذريل ڏينهن عقيدت ۽ احترام سان ملهائي وئي. ان موقعي تي مصطفيٰ قريشي پاڪستان فلم ٽي وي جرنلسٽس ايسوسيئيشن جي وفد سان گڏ حضرت عبدالله شاهه غازي جي مزار جي احاطي ۾ واقع روبينه قريشي جي قبر تي حاضري ڀري، فاتحه خواني ڪئي ۽ مرحومه جي مغفرت ۽ بلند درجن لاءِ دعا گهري. ان کان پوءِ مصطفيٰ قريشي جي طرفان مستحق ماڻهن ۾ نياز پڻ ورهايو ويو. تقريب ۾ پاڪستان فلم ٽي وي جرنلسٽس ايسوسيئيشن جي چيئرمين اطهر جاويد صوفي، صحافي مصطفيٰ ملاح، اشرف ميمڻ ۽ ٻيا پڻ موجود هئا. ان موقعي تي مصطفيٰ قريشي چيو ته روبينه قريشي اڄ به منهنجين يادين ۾ زنده آهي، مان کيس ڪڏهن به وساري نه سگهيو آهيان. هن چيو ته اسان ٻنهي گڏجي پنجاهه سالن کان وڌيڪ عرصو گذاريو، ۽ اڄ سندس يادون ئي منهنجي زندگيءَ جو سڀ کان وڏو سرمايو آهن. هن عوام کي به اپيل ڪئي ته مرحومه روبينه قريشي جي مغفرت ۽ بلند درجن لاءِ خاص دعائون ڪندا رهن.