نوشهروفيروز: آبپاشي کاتي جي ملازمن پاران آبپاشي آفيس آڏو ڌرڻي جو اعلان

ملڪ ۾ مهانگائي ۾ 400 سيڪڙو اضافو ٿي چڪو ، پر ملازمن جي پگهارن ۾ خاطرخواهه اضافو ناهي ٿيو: غلام قمبر مري

نوشهروفيروز (ڊ ر)ٽائيم اسڪيل نه ملڻ، ملازم بابر منگي جي معطلي ۽ مهانگائي جي تناسب سان پگهارن ۾ اضافو نه ڪرڻ خلاف آبپاشي کاتي جي ملازمن سڀاڻي ڪنڊيارو ۾ انجنيئر آفيس آڏو احتجاجي ڌرڻي جو اعلان ڪري ڇڏيو۔ تفصيل موجب آبپاشي کاتي جي ملازمن پنهنجي جائز مطالبن جي حق ۾ احتجاج جو فيصلو ڪيو آهي۔ ان سلسلي ۾ ابدار ڪئنال ايسوسيئيشن سنڌ جي صدر غلام قمبر مري، اياز سنگراسي, مولا بخش سيال, اعجاز راڄپر ۽ نوشهروفيروز ۾ پريس ڪانفرنس ڪندي چيو ته ملڪ ۾ مهانگائي ۾ چار سئو سيڪڙو اضافو ٿي چڪو آهي، پر سرڪاري ملازمن جي پگهارن ۾ ڪو به خاطرخواهه اضافو نه ڪيو ويو آهي، جنهن سبب ملازم سخت معاشي مشڪلاتن کي منهن ڏئي رهيا آهن۔ هنن چيو ته ملازمن جا جائز مطالبا مسلسل نظرانداز ڪيا پيا وڃن، جڏهن ته بابر منگي جي معطلي پڻ ملازمن سان ناانصافي آهي۔ اڳواڻن مطالبو ڪيو ته فوري طور بابر منگي جي معطلي جا حڪم واپس ورتا وڃن، ملازمن کي ٽائيم اسڪيل ڏنو وڃي ۽ مهانگائي جي تناسب سان پگهارن ۾ اضافو ڪيو وڃي۔ غلام قمبر مري خبردار ڪندي چيو ته جيڪڏهن مطالبا تسليم نه ڪيا ويا ته سڀاڻي ڪنڊيارو ۾ آبپاشي کاتي جي انجنيئر آفيس آڏو ڀرپور ڌرڻو هنيو ويندو۔ هن چيو ته احتجاج دوران ڪنهن به ناخوشگوار صورتحال جي ذميواري لاڳاپيل اختيارين تي عائد ٿيندي۔