عورتن جو احترام، سنڀال ۽ سماجي برابري هڪ مهذب سماج جي سڃاڻپ آهي راجوير سنگهه سوڍا

جيڪي ماڻهون ٻين جي سنڀال ڪن ٿا، انهن جي تحفظ سان گڏ سماج جي هر طبقي کي برابري جا حق ملڻ گهرجن

عمرڪوٽ/ڪراچي(رپورٽ:ڪانجي مل رکيسر) راجوير سنگهه سوڍا ڪراچي ۾ عورتن جي عزت، سنڀال، همدردي ۽ انساني قدرن بابت منعقد ڪيل هڪ اهم سيمينار ۾ خاص مهمان طور شرڪت ڪئي، جتي هن عورتن جي حقن، سماجي برابري، ذهني سڪون ۽ سماج جي هر فرد کي برابر حقن جي فراهمي بابت تفصيلي خيال پيش ڪيا، هي سيمينار وي ڪيئر سوسائٽي ۽ وفاقي ايوانِ صنعت و تجارت پاڪستان جي انساني حقن واري قائم ڪميٽي پاران سندن مرڪزي آفيس ڪراچي ۾ منعقد ڪيو ويو، جنهن ۾ سماجي اڳواڻن، ماهرن، مختلف شعبن سان واسطو رکندڙ شخصيتن ۽ سول سوسائٽي جي نمائندن وڏي انگ ۾ شرڪت ڪئي، سيمينار کي خطاب ڪندي راجوير سنگهه سوڍا چيو ته عورتن جي عزت، تحفظ، سماجي شموليت ۽ ذهني خوشحالي هڪ مهذب سماج جي سڃاڻپ آهي، هن چيو ته جيڪي ماڻهون ٻين جي سنڀال ڪن ٿا، انهن جي تحفظ سان گڏ سماج جي هر طبقي کي برابري جا حق ملڻ گهرجن، هن وڌيڪَ چيو ته سنڌ حڪومت عورتن جي حقن، بااختياري ۽ سماجي ڀلائي لاءِ مسلسل عملي قدم کڻي رهي آهي، جن جا مثبت نتيجا سامهون اچي رهيا آهن، سيمينار ۾ شريڪ مقررين عورتن جي عزت، انساني قدرن ۽ سماجي هم آهنگي جي واڌاري لاءِ گڏيل ڪوششن کي وقت جي اهم ضرورت قرار ڏنو.