عمرڪوٽ ۾ باهه متاثرن ۾ چيڪ ورهايا ويا

ڪنور ڪرني سنگهه سوڍا متاثرن ۾ چيڪ ورهايا

عمرڪوٽ(رپورٽ:ڪانجي مل رکيسر)ننگرپارڪر پاڪستان پيپلزپارٽي جي ايم پي اي راڻا همير سنگھ سوڍا پاران اقليتي معاملن واري کاتي مان باھ متاثر خاندانن لاءِ منظور ڪرايل امدادي چيڪ، ڍاٽ جي شهزادي ڪنور ڪرني سنگھ سوڍا ڳوٺ ڪاسٻو لڳ هيمون ڪولهي جي ڍاڻي پهچي متاثر خاندانن ۾ تقسيم ڪيا۔ ياد رهي ته ڪجهه ڏينهن اڳ پيش آيل افسوسناڪ باھ واقعي سبب ڪيترائي خاندان سخت متاثر ٿيا هئا، جنهن بعد راڻا همير سنگھ سوڍا امدادي سهائتا جي خاطري ڪرائي هئي۔ ان سلسلي کي جاري رکندي اڄ اسپيشل اسسٽنٽ ٽو سي ايم سنڌ اقليتي معاملن واري کاتي، حڪومت سنڌ ڊاڪٽر شام سندر آڏواڻي صاحب جي سهڪار تحت متاثر خاندانن کي مالي امداد جا چيڪ فراهم ڪيا ويا۔ان موقعي تي ڪنور ڪرني سنگھ سوڍا چيو ته اسان ۽ پاڪستان پيپلزپارٽي ڏک ۽ تڪليف جي هر گهڙي ۾ متاثر خاندانن سان هميشا گڏ آهيون۔ مقامي رهواسين پاران هن انساني همدردي واري قدم کي ساراهيو ويو ۽ حڪومت سنڌ، پاڪستان پيپلزپارٽي ۽ راڻا خاندان جا ٿورا مڃيا.